Дар доираи сафари расмӣ ба Тоҷикистон президенти Қазоқистон Нурсултон Назарбоев нимаи дуюми рӯзи 14 сентябр аз палатаи поёнии парлумони Тоҷикистон боздид намуда. бо раиси Маҷлиси намояндагони Маҷлиси Олии ҶТ Шукурҷон Зуҳуров дидору гуфтушунид кард.
Котиби матбуотии палатаи поёнии парлумони ҷумҳурӣ Муҳаммадато Султонов ба «Азия-Плюс» дар ин робита иттилоъ дод, ки зимни мулоқот масъалаҳои таҳкими робитаҳои парлумонии ҳарду кишвар баррасӣ шуданд.
Президенти Қазоқистон таъкид дошт, ки ба парлумони Тоҷикистон интихоб шудани намояндагони шаш ҳизби сиёсӣ гувоҳи он аст, ки интихоботи моҳи март дар кишвар озодона ва ба таври демократӣ баргузор шудааст. Сарвари давлати Қазоқистон ҳамсуҳбати худро бо такроран интихоб шуданаш ба мансаби раиси палатаи поёнии парлумон табрик кард.
Ҳамчунин зимни вохӯрӣ ҷонибҳо атрофи густариши ҳамкории Тоҷикистону Қазоқистон дар бахшҳои сармоягузорӣ, иқтисод, тиҷорат, маориф ва фарҳанг ва ҳамчунин дигар масоили мавриди таваҷҷуҳи тарафайн табодули назар намуданд.
