Имрӯз дар Душанбе иҷлосияи Шӯрои амнияти дастаҷамъии Созмони Аҳдномаи амнияти дастаҷамъӣ (СААД) ба кор шурӯъ мекунад.
Бино ба маълумоти Вазорати корҳои хориҷии ҶТ, ҷиҳати иштирок дар ин чорабинӣ рӯзи душанбе сарони панҷ кишвари узви СААД ва ҳамчунин ҳайатҳои расмии ин кишварҳо ба пойтахти Тоҷикистон ташриф оварданд. Айни замон сарони кишварҳои Арманистон Серж Саргсян, Беларус Александр Лукашенко, Қазоқистон Нурсултон Назарбоев, Қирғизистон Алмазбек Атамбоев ва Русия Владимир Путин дар Душанбе қарор доранд.
Ба кори иҷлосия, ки дар маҷмааи Кохи миллати пойтахт доир мегардад, президенти Тоҷикистон Эмомалӣ Раҳмон ҳусни оғоз мебахшад.
Пеш аз нишаст дар қароргоҳи ҳукумат дар Душанбе ҷаласаи муштараки Шӯрои вазирони корҳои хориҷӣ, Шӯрои вазирони мудофиа ва Кумитаи котибони Шӯрои амнияти кишварҳои узви СААД доир мегардад.
Аз рӯи натиҷаҳои иҷлосияи Шӯрои амнияти дастаҷамъии СААД, Шӯрои вазирони корҳои хориҷӣ, Шӯрои вазирони мудофиа ва Кумитаи котибони Шӯрои амнияти кишварҳои узви СААД имзои як қатор санадҳо дар назар аст.
Қобили зикр аст, ки имсол раёсат дар СААД-ро Тоҷикистон ба уҳда дорад. Айни замон кишварҳои Арманистон, Беларус, Қазоқистон, Қирғизистон, Русия ва Тоҷикистон узви СААД мебошанд.
