Дар муқоиса бо 10 моҳи ҳамин давраи соли гузашта давоми моҳҳои январ-октябри соли 2015 ҳаҷми муомилоти моли хориҷии Тоҷикистон ба маблағи 836,6 млн. доллари ИМА кам шуд.
Аз Агентии омори назди президенти ҶТ ба «Азия-Плюс» дар ин робита иттилоъ доданд, ки тайи 10 моҳи соли равон ҳаҷми умумии муомилоти моли хориҷии Тоҷикистон беш аз 3,5 млрд. доллари ИМА-ро ташкил додаст, ки нисбат ба ҳамин давраи соли гузашта ба андозаи 19,2% камтар аст.
Тавозуни савдо дар ин давра манфӣ буда, зиёда аз 2 1 млрд. доллари ИМА-ро ташкил додааст.
Ҳаҷми содироти мол тӯли 10 моҳи соли ҷорӣ ҳудуди 750 млн. доллари ИМА-ро ташкил додааст, ки дар муқоиса бо нишондиҳандаи ҳамин давраи соли гузашта 7,7% ё худ 62,4 млн. доллари ИМА камтар мебошад. Аз ҷумла ҳаҷми содироти нахи пахта тақрибан ба миқдори 20%, металлҳои арзон ва маснӯот аз он – 1,3% коҳиш ёфтааст.
Дар ҳамин ҳол, ҳаҷми воридоти мол ба 2,8 млрд. ИМА баробар шудааст, ки нисбат ба моҳҳои январ-октябри соли гузашта 21,8% ё худ 774 млн. доллари ИМА камтар аст. Дар ин самт метавон аз коҳиши воридоти маҳсулоти нафтӣ ба андозаи 21,3% ва орд 35,2% ҳарф зад.
Давоми моҳҳои январ-октябри соли ҷорӣ Тоҷикистон бо 87 кишвари дунё муомилоти молӣ анҷом додааст. Шарикони асосии тиҷоратии Тоҷикистон дар ин давра Русия (ҳудуди 940 млн. $), Чин (608 млн. $) ва Қазоқистон (590 млн. $) дониста шудаанд.
