Субҳи имрӯз, 26 ноябр ҳайати парламентии Маҷлиси Олии Ҷумҳурии Тоҷикистон таҳти роҳбарии Раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев дар ҷаласаи Шӯрои Ассамблеяи Парламентӣ (АП)-и Созмони Аҳдномаи амнияти дастаҷамъӣ (СААД) дар қасри Таврическии шаҳри Санкт-Петербурги Федератсияи Россия ширкат варзид.
Тавре Х.Қурбонов, мудири шӯъбаи Дастгоҳи Маҷлиси миллӣ оид ба робитаҳои байнипарламентӣ иттилоъ дод, дар ҷаласаи Шӯро дар баробари аъзои Шӯро, ҳайатҳои парламентии давлатҳои иштирокчии Ассамблеяи Парламентии СААД, ҳайатҳои парламентии Ҷумҳурии Исломии Покистон таҳти роҳбарии Раиси Ассамблеяи миллӣ Сардор Аёз Содиқ, Ҷумҳурии Исломии Афғонистон таҳти роҳбарии Раиси Волеси Джиргаи Ассамблеяи миллии Ҷумҳурии Исломии Афғонистон Абдул Рауф Иброҳимӣ, Ҷумҳурии Исломии Эрон, Ҷумҳурии Халқии Хитой, Скупшинаи халқии Сербия ва дигарон ширкат варзиданд.
Шӯрои Ассамблеяи Парламентии СААД масъалаҳоеро, ки ба баррасии Ассамблеяи Парламентии Созмон пешниҳод карда мешаванд, аз ҷумла дар бораи натиҷаҳои ҷаласаи мушовараи ҳамоҳангсозии раисони кумитаҳои парламентҳои давлатҳои-иштирокчии СААД оид ба мудофиа ва амният ва мониторинги ҳолати ҳарбӣ-сиёсии амнияти дастаҷамъии СААД дар минтақаи Осиёи Марказӣ, ки 26-27 майи соли 2015 дар шаҳри Душанбе баргузор гардида буд, доир ба иштироки намояндагони Ассамблеяи Парламентии Созмон дар маъракаи интихоботи Президенти Қазоқистон, интихоботи вакилони Жогорку Кенеши Қирғизистон, оид ба натиҷаҳои иҷлосияи сентябрии (соли 2015) Шӯрои амнияти дастаҷамъӣ ва натиҷаҳои фаъолияти кунунии Созмон доир ба мубориза бар зидди даъватҳо ва таҳдидҳо ва ғайраро муҳокима намуд.
