Ду нафар сокини шаҳри Душанбе, ки дар муҳоҷирати корӣ тасмим гирифтаанд ба сафҳои гурӯҳи террористии ба ном «Давлати исломӣ» (ДИ) бипайвананд, дар Туркия боздошт ва ба ватан баргардонида шуда, барои ин хоҳишашон ҳар кадоме ба 7 соли зиндон маҳкум шуданд.
Ҳамин тариқ, бо ҳалномаи суди ноҳияи Исмоили Сомонии пойтахт, сокини шаҳри Душанбе Ботиралӣ Ҷалолов мутобиқи моддаҳои 32 (Омодагӣ ба ҷиноят ва суиқасд ба ҷиноят) ва 400 (Иштирок дар низоъҳои мусаллаҳ дар хориҷи кишвар)-и КҶ ҶТ гунаҳкор дониста шуда, ба 7 соли зиндон маҳкум шудааст.
Маркази матбуоти Прокуратураи генералии ҶТ дар ин робита иттилоъ медиҳад, ки Ҷалолов Б. барои он гунаҳгор дониста шудааст, ки моҳи июли соли 2015 ҳангоми дар муҳоҷирати меҳнатӣ дар Федератсияи Россия қарор доштанаш тавассути сомонаи иҷтимоии “Одноклассник” бо шаҳрванди Ҷумҳурии Ӯзбекистон бо номи “Абу-Майрам” шинос шуда, даъвати ӯро ба иштирок дар амалиётҳои ҷангӣ дар ҳайати ташкилоти экстремистӣ ва террористии бо ном “Давлати Исломӣ” дар ҳудуди Сурия пазируфтааст.
Сипас санаи 13 октябри соли 2015 ӯ тавассути ҳавопаймо ба шаҳри Истамбул парвоз намуда, аз он ҷо 10 ноябри соли 2015 ҷиҳати убури сарҳади давлатии байни Туркия ва Сурия ба шаҳри Газиентеппа сафар намудааст. Дар он ҷо ӯ аз ҷониби кормандони мақомоти ҳифзи ҳуқуқи давлати Туркия дастгир ва ба ихтиёри Тоҷикистон дода шудааст.
Ба иттилои манбаъ, барои содир намудани ҷинояти ба ин монанд суди ноҳияи Фирдавсии пойтахт боз як сокини шаҳри Душанбе Назаралӣ Сафарзодаро низ ба 7 соли зиндон маҳкум намудааст.
Гуфта мешавад, барои пайвастан ба сафҳои Давлати исломӣ Н.Сафарзода бо маслиҳату ҳидояти шаҳрванди ҶТ А.Доров санаи 7 октябр аз шаҳри Санкт-Петербург озими Истамбул шуда, рӯзи 29 ноябри соли гузашта ҳангми убури марзи Сурия аз ҷониби хадамоти махсуси Туркия боздошт ва ба ихтиёри Тоҷикистон супурда шудааст.
