Раиси палатаи поёнии парлумон Шукурҷон Зуҳуров имрӯз, 13 май зимни баррасии лоиҳаи тағйироту илова ба қонун «Дар бораи танзими давлатии ҳосилхезгардонии заминҳои таъиноти кишоварзӣ» бори дигар аз дастовардҳои начандон назарраси кишоварзони кишвар интиқод кард.
«Соли гузашта дар ҳудуди 300 ҳазор гектар зироати ғалладона кишт шуда, ҳосили бадастомада наздики 800 ҳазор тоннаро ташкил дод, ки ҳамагӣ ба нисфи талаботи ҷумҳурӣ баробар аст», – гуфт ӯ.
Дар идома ӯ зикр кард, ки соли гузашта кишоварзон аз ҳар як гектар ба ҳисоби миёна 28 сентнер зироати ғалладона ҳосил гирифта, барои комилан бо зироати ғалладона таъмин кардани ҷумҳурӣ, аз як гектар ҳадди ақал ба даст овардани 50 сентнер ҳосил зарур аст.
Мутобиқи тағйироту иловаҳои имрӯз ба қонуни зикршуда қабулшуда, минбаъд дар Тоҷикистон ҳамаи хоҷагиҳои деҳқониву фермерӣ ба иҷрои тадбиру меъёрҳои аз ҷониби Вазорати кишоварзӣ муқарраршуда оид ба ғизодиҳӣ, шудгору кишт ва обёрии замин уҳдадор карда мешаванд.
Ёдрас мекунем, ки моҳи октябри соли гузашта зимни баррасии тағйироту иловаҳо ба қонун «Дар бораи тухмипарварӣ» низ Шукурҷон Зуҳуров фаъолияти Вазорати кишоварзии ҷумҳурӣ дар ин самтро
мавриди интиқоди шадид
қарор дода буд.
