Дар суди ноҳияи Бобоҷон Ғафурови вилояти Суғд мурофиаи судӣ оид ба баррасии парванда нисбаи ду нафар сокинони вилоят ба гумони узвият дар созмони ифротграоии динии «Салафия» оғоз гардид.
Аз суди ноҳияи мазкур ба «Азия-Плюс» дар ин робита иттилоъ доданд, ки сокинони деҳаи Ғозиён К.Д. ва С.А., соли таваллудашон 1975 ва 1988 мутобиқи моддаи 307, қ. 2, эзоҳи 3 айбдор карда шуда, ду моҳ пеш аз ҷониби мақомоти ҳифзи ҳуқуқ боздошт шудаанд.
Ёдрас мекунем, ки ҷараёни мазҳабии «Салафия», ки фаъолияташро аввали соли 2009 Суди олии ҷумҳурӣ манъ карда буд,
гурӯҳи ифротгаро дар Тоҷикистон эътироф шуд.
Қобили зикр аст, ки ҳукми нахуст нисбати тарафдорони ҷараёни «Салафия» дар Тоҷикистон моҳи октябри соли 2010 аз ҷониби суди ноҳияи Сино содир гардида буд. Бо ин ҳукм 7 нафар – Сироҷиддин Абдураҳмонов, яке аз ҷонибдорони маъруфи ин ҷараён, Киромиддин Абдураҳмонов, писари ӯ ва ҳамчунин Абдураҳмон Абдураҳимов, Муҳаммадраҷаб Наврӯзов, Шаҳобиддин Саидов, Музаффар Файзуллоев ва Икромиддин Юсуфов маҳкум шуда буданд.
Айни замон дар қаламрави Тоҷикистон фаъолияти гурӯҳу созмонҳои ифротгарову террористие чун «Ал-Қоида», Ҳаракати исломии Ӯзбекистон, «Ҷамоати Таблиғ», «Толибон», «Тоҷикистони озод», «Ҳизб-ут Таҳрир», Гурӯҳи 24» ва Ҳизби наҳзати исломии Тоҷикистон мамнӯъ эълон шудааст.
