Прокурори генералии Тоҷикистон Юсуф Раҳмон рӯзи 10 июл бо сафари корӣ ба Қирғизистон раҳсипор гардида, дар мулоқот бо прокурори генералии Қирғизистон Индира Ҷолдубаева дар Бишкек маҷмӯи васеи масоили таҳкими минбаъдаи ҳамкориҳои дуҷонибаро баррасӣ мекунад.
Аз Прокуратураи генералии ҶТ ба «Азия-Плюс» дар ин робита иттилоъ доданд, ки дар вохӯрии мазкур баррасии масоили муқовимат ба терроризми байнулмилалӣ ва ифротгароии динӣ, мубориза бо ҷинояткории фаромиллӣ, пешгирии қочоқи маводи мухаддир ва силоҳ тариқи марзҳои давлатии Тоҷикистону Қирғизистон дар назар аст.
Ёдрас мекунем, ки ҳайати Прокуратураи генералии Қирғизистон таҳти сарварии прокурори генералии ин кишвар Индира Ҷолдубаева охири моҳи ноябри соли гузашта бо сафари корӣ ба Душанбе ташриф оварда буд.
Ин сафар дар доираи амалисозии Созишнома дар бораи кумаки ҳуқуқӣ ва ҳамкорӣ миёни Прокуратураҳои генералии Қирғизистону Тоҷикистон, ки 27 августи соли 2015 дар шаҳри Остона ба имзо расида буд, сурат гирифт.
