Дар маркази маъмурии Вилояти Мухтори Кӯҳистони Бадахшон – шаҳри Хоруғ рӯзҳои 23-24 август форуми навбатии «Помир Инвест-2016» доир мегардад.
Тавре аз Ассотсиатсияи соҳибкорони «Милал Интер хабар доданд, чанде пеш ҳукумати Тоҷикистон Барномаи баргузор намудани форумро тасдиқ кардааст.
«Ҳадаф аз баргузории ин чорабинӣ ҷалби таваҷҷуҳи сармоягузорони ватанӣ ва хориҷӣ ба истифодаи имконот ва ҳаллу фасли мушкилоти ВМКБ дар бахшҳои истеҳсолот ва рушди зербинои сайёҳии минтақа аст», – гуфт манбаъ.
Ба иттилои манбаъ, то 4 август аз соҳибкорони ВМКБ ба унвони кумитаи тадорукоти Форум ҳудуди 70 лоиҳаҳои тиҷоратӣ оид ба роҳандозӣ ва рушди истеҳсолот дар бахшҳои гуногуни иқтисоди вилоят ворид шудааст.
Дар кори Форум иштироки намояндагони сафоратхонаҳои як қатор давлатҳо, сармоягузорони ватанию хориҷӣ, донорҳо, соҳибкорон ва намояндагони созмонҳои байналмилалӣ дар назар аст.
Созмондиҳандагони форум Кумитаи давлатии сармоягузорӣ ва идораи амволи давлатии Тоҷикистон, мақомоти маҳаллии иҷроияи ҳокимияти давлатии ВМКБ ва Ассотсиатсияи соҳибкорони «Милал Интер» мебошанд.
