Кормандони мақомоти милитсияи ноҳияи Фирдавсии пойтахт сокини ноҳияи Бобоҷон Ғафурови вилояти Суғд, ҷавондухтари 17-соларо ба гумони даст доштан дар дуздии як миқдор маснӯоти тиллоӣ ба маблағи умумии 9 ҳазор сомонӣ боздошт карданд.
Дафтари матбуоти ВКД Тоҷикистон дар мавриди ин ҳодиса маълумот медиҳад, ки боздоштшуда пинҳонӣ ба манзили сокини 39-солаи шаҳри Душанбе ворид ва аз он ҷо ҷавоҳироти тиллоиро дуздида, аз ҷойи ҳодиса ғайб задааст.
Бино ба маълумоти Агентии омори назди президенти ҶТ, тӯли 8 моҳи соли ҷорӣ дар ҷумҳурӣ 3 ҳазору 539 адад ҷинояти дуздӣ содир шудааст, ки нисбат ба ҳамин давраи соли гузашта 240 ҳолат зиёдтар мебошад.
