Ҳаҷми қарзи хориҷии Тоҷикистон ба аввали моҳи октябри соли равон қариб 2,3 млрд. доллари ИМА-ро ташкил дода, аз оғози соли равон (аввали соли 2016 – ҳудуди 2 млрд. 182 млн. $) ба миқдори 118 млн. доллари ИМА афзуд.
Бино ба маълумоти Вазорати молияи ҶТ, дар сохтори қарзи берунаи ҷумҳурӣ беш аз 2,1 млрд. доллари ИМА ба қарзи бевоситаи давлатӣ рост меояд, ки иҷрои хизматрасониҳои ҳукумати кишварро таъмин мекунад.
Ҳаҷми қарзҳо бо кафолати давлатӣ дар сохтори қарзи беруна ҳудуди 22 млн. доллари ИМА-ро ташкил медиҳад.
Ҳудуди 31,5 млн. доллари ИМА-ро қарзҳои корхонаҳои давлатӣ ташкил медиҳанд, ки кафолати давлатӣ надоранд.
Қарзи Бонки миллии Тоҷикистон ба Хазинаи байнулмилалии асъор, ки барои нигаҳдории тавозуни пардохтҳо гирифта шуд, ба 122 млн. доллари ИМА баробар аст.
Ҳаҷми қарзҳои гирифтаи Бонки миллии Тоҷикистон аз Чин – 10 млн. доллари ИМА ва аз Бонки исломии рушд – 5,1 млн. доллари ИМА-ро ташкил медиҳад.
Ҳаҷми қарзи хориҷии Тоҷикистон нисбат ба Маҷмӯи маҳсулоти дохилии кишвар айни замон ба 35,6% баробар аст.
Дар ҳамин ҳол, палатаи поёнии парлумон рӯзи 16 ноябр «Барномаи қарзҳои давлатии хориҷии ҶТ барои давраи солҳои 2017-2019»-ро тасдиқ намуд, ки тибқи ин барнома се соли оянда ҷалби беш аз 967 млн. доллар ба сифати қарзҳои имтиёзнок дар назар аст.
