Раиси шаҳри Душанбе Маҳмадсаид Убайдуллоев ҷаласаи васеи фаъолони пойтахтро баргузор намуд, ки дар он вазъи омодагии шаҳр ба мавсими зимистон мавриди баррасӣ ва таҳлил қарор гирифт.
Зимни суханронӣ прокурори шаҳри Душанбе Хайрулло Саидзода аз фаъолияти воҳидҳои ширкати «Барқи тоҷик», аз ҷумла шабакаҳои барқи Душанбе нигаронӣ изҳор намуда, ҷой доштани далелҳои поймолкунии ҳуқуқҳои истеъмолгарон ҷиҳати дастрасӣ ба нерӯи барқ ва истифодаи мансабӣ хизматӣ аз ҷониби бархе аз нозиронро, ки воситаҳои шаҳрвандонро азхуд мекунанд, қайд кард.
Ба гуфтаи прокурор, далелҳои марбут ба тағйир додани нишондиҳандаҳои ҳисобкунаки истифодаи барқ аз ҷониби бархе аз нозирон ошкор шуда, аз рӯи чанде аз ин ҳолатҳо парвандаҳои ҷиноӣ боз шудааст.
Маҳмадсаид Убайдуллоев ба шахсони масъул дастур дод, ки ҷиҳати таъмини 1 ҳазору 242 бино, аз ҷумла 1 ҳазору 82 бинои манзилҳои истиқоматии пешбинишуда бо энергияи гармӣ тадбирҳо андешида шуда, он таҳти назорат гирифта шавад.
Ба директори корхонаи Шабакаҳои барқи Душанбе Асадулло Раҳимзода раиси пойтахт дастур дод, ки шумори телефонҳои бовариро зиёд намуда, аз прокуратураи шаҳр дархост шуд, ки ҷараёни хизматгузориҳои воҳидҳои ширкати «Барқи тоҷик» ба аҳолӣ зери назорати қатъӣ қарор дода шавад.
Ба муовини соҳавии раиси пойтахт, сардорони Раёсатҳои маориф ва тандурустии пойтахт раиси шаҳр ҷиҳати пурра бо гармӣ таъмин намудани муассисаҳои зертобеъи онҳо як ҳафта муҳлат дод.
Маҳмадсаид Убайдуллоев фаъолияти сохторҳои шаҳр дар мавриди рафъи оқибатҳои барфрезиро мавриди интиқод қарор дода, барои муносибати хунукназарона нисбати иҷрои вазифаи худ сардори Раёсати истифодабарии роҳҳои ноҳияи Исмоили Сомонӣ Саид Каримовро аз мансаб сабукдӯш кард.
Зимни таҳлили фаъолияти нақлиёти ҷамъиятӣ дар пойтахт, раиси шаҳр изҳор намуд, ки дар ҳолате, ки агар далели ба хатсайр баромадани камтар аз 70%-и нақлиёти ҷамъиятӣ ошкор гардад, иҷозатномаи субъекти гунаҳкор ба ин ҳолат бозхонда мешавад.
Дар ҷаласа ҳамчунин дигар масоили муҳиму рӯзмарраи хоҷагидории пойтахт, аз ҷумла таъмини бозорҳо бо маводи ғизойии ниёзи аввалияи мардум, фаъолияти мунтазами муассисаҳои иҷтимоӣ, таъминот бо об ва ғайра низ баррасӣ шуданд.
