Зимни мулоқоти сардорони Ситоди кулли Қувваҳои Мусаллаҳи Русия ва Тоҷикистон генерали артиш Валерий Герасимов ва генерал-майор Эмомалӣ Собирзода дар Маскав масоили рӯи кор гирифтани тадбирҳои иловагии муштарак ҷиҳати тақвияи ҳолати омодабоши ҷангии артиши Тоҷикистон мавриди баррасӣ қарор гирифтанд.
Валерий Герасимов дар ҷараёни мулоқот изҳор дошт, ки айни замон Русия ба Тоҷикистон техникаву муҳимоти ҳарбӣ ва аслиҳа интиқол дода, дар макотиби олии Вазорати мудофиаи ин кишвар барои артиши Тоҷикистон бепул кадрҳои соҳибтахассус ва ҳамчунин дар пойгоҳи 201-уми низомии Русия дар Тоҷикистон ҳамасола то 1 ҳазор мутахассисони зинаҳои хурд омода мешаванд.
«Дар масъалаи таҳкими амният дар минтақаи Осиёи Марказӣ мо вазифаҳои умумӣ дошта, бо роҳандозии ҳамкорӣ байни вазоратҳо ба густариши робита бо Тоҷикистон дар соҳаҳои низомӣ ва низомӣ-техникӣ таваҷҷуҳи ҷиддӣ зоҳир менамоем ва инро омили муҳими нигаҳдории суботи минтақавӣ мешуморем», – таъкид доштааст В.Герасимов.
Дар навбати худ генерал-майор Эмомалӣ Собирзода барои таваҷҷуҳ ба рушди ҳамкориҳои дуҷониба ва ҳамдастӣ дар таҳкими артиши Тоҷикистон ба ҳамсуҳбати худ минннатдорӣ изҳор намудааст.
«Агар доир ба натиҷаҳои корамон дар соли 2016 сухан гӯем, қайд карданиам, ки дар ҳаллу фасли масъалаҳои ҷудогонаи мавриди таваҷҷуҳи тарафайн мо ба таври назаррас муваффақ шудем, самтҳои нави ҳамкориро роҳандозӣ намуда, вазифаҳои афзалиятнокро муайян кардем, ки имсол онҳоро бояд ба иҷро расонем», – гуфтааст Эмомалӣ Собирзода.
Ёдрас мекунем, ки 30 ноябри соли 2016 зимни вохӯрӣ бо вазири мудофиаи Тоҷикистон Шералӣ Мирзо вазири мудофиаи Русия Сергей Шойгу изҳор дошта буд, ки соли 2017 Русия ба фиристодани миқдори зиёди техникаи авиатсионӣ, аз ҷумла ҳавопаймоҳову чархболҳо ба Тоҷикистон шурӯъ мекунад.
«Соли оянда марҳилаи калидии ҳамкории низомӣ-техникии мо, таҳвили аслиҳаву муҳимоти ҷангӣ ва техникаи ҳарбӣ фаро мерасад. Аз ҷумла, ин миқдори зиёди техникаи авиатсионӣ, ҳавопаймоҳо ва чархболҳо мебошад. Фикр мекунам, ки ин корҳо саривақт ва тибқи нақша ба иҷро мерасанд. Албатта, ин иқдом ба таъмину амнияту субот дар ин минтақа мусоидат мекунад», – гуфта буд вазири мудофиаи Русия.
Дар инфографикаи «Азия-Плюс»- иқтидори ҳарбии Тоҷикистон
