Дар қароргоҳи Созмони ҳамкории Шанхай (СҲШ) дар Пекин бахшида ба муаррифии санади стратегии Тоҷикистон – Стратегияи миллии рушди Тоҷикистон то соли 2030 мизи гирд доир гардид.
Бино ба маълумоти сомонаи расмии СҲШ, дар суханронии шодбошии худ Дабири кулли СҲШ Рашид Олимов қайд кард, ки «Тоҷикистони муосир дар ҳоли рушд қарор дошта, қабули санади стратегӣ самти рушди тадриҷии минбаъдаи онро муайян мекунад».
Сафири Тоҷикистон дар Чин Парвиз Давлатзода ба ҳозирин маълумот дод, ки барои расидан ба мақсадҳои дар санад зикргардида ҳукумати Тоҷикистон 4 ҳадафи стратегии рушдро муайян кардааст.
«Ин ҳадафҳо иборатанд аз таъмини амнияти энергетикӣ ва истифодаи самарноки энергия, раҳоӣ аз бунбасти коммуникатсионӣ ва ба кишвари транизитӣ табдил додани Тоҷикистон, таъмини амнияти озуқаворӣ ва дастрасии аҳолӣ ба ғизои хушсифат ва густариши шуғли пурмҳсули аҳолӣ», – иброз доштааст сафир.
Ба қисмати барномаи иборат аз муаррифии лоиҳаҳои амалишаванда дар Тоҷикистон аз ҷониби ширкатҳои Чин, аз ҷумла China Global, TBEA, China Road and Bridge Сonstruction, ширкати роҳи оҳани Чин 19, ширкати чинии азхудкунии кони тиллои Пакрут, Хуавэй ва ғайра таваҷчуҳи хосса зоҳир шуд.
Зимни ҷамъбасти кори мизи гирд сафир Давлатзода зикр кард, ки Тоҷикистон барои рушди минбаъда аз ҳамаи имконот, аз ҷумла сармояи бойи инсонӣ, аҳолии ҷавон, захираҳои бахши кишоварзиву саноати кӯҳкорӣ, захираҳои обӣ ва энергетикӣ, табиати афсункор ва наздикӣ ба бозорҳои бузург дар Шимол, Ҷануб ва Шарқ бархӯрдор буда, барои ҳамкорӣ бо ҳамаи ҳамсокишварҳову шарикон омода аст.
Қобили зикр аст, ки Стратегияи миллии рушди Тоҷикистон барои давраи то соли 2030 аз ҷониби парлумон моҳи декабри соли гузашта қабул шуда буд.
Ҳаҷми умумии ҳамаи воситаҳои пешбинишуда барои 15 соли минбаъда аз рӯи ҳамаи сарчашмаҳои маблағгузорӣ ба 118 млрд. 133 млн. доллар баробар аст.
Ба сифати сарчашмаҳо ҷиҳати амалисозии Стратегия воситаҳои буҷети давлатии кишвар дар ҳаҷми 56,1 млрд. доллар ва сармоягузориҳои хусусӣ ба маблағи ҳудуди 55 млрд. доллар дар назар дошта шудааст.
