Президенти Тоҷикистон Эмомалӣ Раҳмон баъди як ҳафта ҷиҳати иштирок дар нишасти сарони кишварҳои узви Созмони ҳамкориии Шанхай (СҲШ) ва маросими ифтитоҳи намоиши байнулмилалии ЭКСПО ба шаҳри Остона раҳсипор мешавад.
Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, дар ҳошияи кори нишаст як қатор дидору гуфтушунидҳои сарвари давлати Тоҷикистон дар назар аст.
СҲШ созмони байнулмилалиест, ки соли 2001 аз ҷониби сарони кишварҳои Чин, Русия, Қазоқистон, Тоҷикистон, Қирғизистон ва Ӯзбекистон таъсис дода шуд. Моҳи июни соли 2016 зимни нишаст дар Ӯзбекистон дар бораи узвияти Ҳидустон ва Покистон ба Созмон ёддошт ба имзо расид.
Айни замон Афғонистон, Беларус, Эрон ва Муғулистон кишварҳои нозири СҲШ буда, Озарбойҷон, Арманистон, Камбоҷа, Непал, Туркия ва Шри-Ланка кишварҳои шарики Созмон мебошанд.
Қобили зикр аст, ки ЭКСПО-2017-ро ҳукуматдорони Қазоқистон намоиши бузургтарини дастовардҳои техникии ҷаҳон муаррифӣ мекунанд. Намоиш таҳти шиори «Энергияи оянда» доир гардида, ба сарчашмаҳои алтернативии энергия бахшида шудааст. Дар кори намоиши ЭКСПО-2017 иштироки намояндагони беш аз 100 кишвари саросари дунё ва созмонҳои байнулмилалӣ дар назар аст. Шумори пешбинишудаи тамшобинон аз ин намоиш 2-3 млн. нафар арзёбӣ мешавад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
