Донишҷӯи соли 4-уми яке аз донишгоҳҳои олии кишвар, сокини 23-солаи пойтахтро кормандони милитсия ба гумони ғайриқонунӣ маҳрум сохтан аз озодӣ дастгир карданд.
Дафтари матбуоти ВКД Тоҷикистон дар ин робита иттилоъ медиҳад, ки номбурда ҷавони 21-солаи сокини кӯчаи Испечаки шаҳри Душанберо бо роҳи фиреб ба хонаи истиқоматиаш, воқеъ дар кӯчаи Борбад бурда, ғайриқонунӣ аз соати 20:30-дақиқа то соати 06:00-дақиқа аз озодӣ маҳрум кардаааст.
«Ӯ ба ҷабрдида гуфтааст, ки ба ҳар роҳу восита ба рафти тафтишоти пешакӣ монеъ шуда, ба бародараш ҷавонписари 19-сола, ки айни ҳол барои содир намудани ҷиноят бо моддаи 248 (ғоратгарӣ) Кодекси ҷиноятии ҶТ дар ҳабси пешакӣ қарор дорад, кӯмаки худашро расонад», – омадааст дар маълумоти ВКД.
Гуфта мешавад, нисбати марди 23-сола бо моддаи 131 (ғайриқонунӣ маҳрум сохтан аз озодӣ) ва 345 (монеъ шудан ба татбиқи адолати судӣ) Кодекси ҷиноятии ҶТ парвандаи ҷиноятӣ оғоз карда шуда, тафтишот идома дорад.
