Маълумоти чанде аз ВАО дар бораи оғози фаъолияти гузаргоҳи марзӣ дар қитъаи сарҳади Панҷакент – Самарқанд асоси воқеӣ надорад. Дар ин бора ба «Азия-Плюс» як манбаъ аз ҳукумати Тоҷикистон хабар дод.
Бино ба иттилои манбаъ, гурӯҳҳои кории ҳукумати ду кишвар айни замон ин масъаларо мавриди баррасиву таҳлил қарор додаанд.
Сокинони шаҳри Панҷакент ба «Азия-Плюс» дар ин робита иттилоъ доданд, ки айни замон марз пурра баста буда, дар қаламрави ҳарду кишвар сохтмони терминалҳои гумрукӣ, истгоҳи автомашинаҳо ва нуқтаҳои фурӯши сӯзишворӣ босуръат ҷараён дорад.
Ёдрас мекунем, ки Ӯзбекистон ҷониби Тоҷикистонро огоҳ карда буд, ки аз 1 ноябри соли 2010 фаъолияти гузаргоҳи байнулмилалии Саразм дар водии Зарафшони Тоҷикистон ва мавзеи Ҷартеппаи вилояти Самарқанди Ӯзбекистон боздошта мешавад.
Дар номаи ба унвони Тоҷикистон фиристода зикр гардида буд, ки дар ин қитъаи марз ҳам равуои шаҳрвандон ва ҳам боркашионӣ мутаваққиф мегардад. Он замон ҷониби Ӯзбекистон сабаби ин амалро шарҳ надода буд.
Қобили зикр аст, ки имрӯз дар марзи Тоҷикистону Ӯзбекистон шабонарӯзӣ ду гузарогоҳи байнулмилалӣ – шаҳри Турсунзода – Сариосиё ва ноҳияи Мастчоҳ – Ойбек амал мекунанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
