“Намоз ибодати бузург аст ва бояд онро муқаддас донист, аз ин рў, гузоридани он дар ҷойҳои нопок ва олуда аз нигоҳи шариати Ислом ва хусусан фиқҳи мазҳаби ҳанафӣ нораво ва нописандида аст”,- зикр шудааст дар шарҳи раёсати Маркази исломии Тоҷикистон.
Донишмандони маркази мазкур бо такя ба китобҳои фиқҳӣ баргузор намудани намоз дар маконҳои зеринро макрӯҳ шуморидаанд:
– дар рў ба рўи оташ, гулхан ва оташдоне, ки дар он оташ бошад, дар ҷойҳои нолоиқ ва олуда (ҳаммом, гирду атрофи ҳоҷатхона ва роҳравҳои олудаву нопок), дар миёни роҳ ва дар гӯристон.
Ҳамчунин, дар шарҳи раёсати Маркази исломии Тоҷикистон аз Абдуллоҳ ибни Умар (р) ривоят оварда шудааст, ки Расули Худо (с) аз намоз гузоридан дар ҳафт макон манъ карданд: партовгоҳ, кушторгоҳи ҳайвонот, қабристон, роҳи рафтуомад, ҳаммом, ҷойи хоби шутурон, болои Каъба (Ривояти Тирмизӣ).
Раёсати Маркази исломии ҷумҳурии Тоҷикистон аз сокинони кишвар даъват намудааст, ки намозҳои худро дар маконҳои тозаву покиза хонанд. Дар ин маврид аз Расули Худо (с) ҳадисе ривоят шудааст: «Худованд пок аст ва покиро дӯст медорад» (Ривояти Тирмизӣ). Инчунин, дар шарҳи марказ омадааст, ки “тибқи таълимоти мазҳаби Имоми Аъзам дар китоби «Мухтасар-ул-виқоя» дар боби фарзҳои хориҷи намоз омадааст, «…тоҳир (пок) будани макони намозхон фарз аст. Агар макон тоҳир набошад, намози мусаллӣ (намозгузор) ботил (беэътибор) дониста мешавад”.
– Агар мусулмон бо дилу нияти пок дар манзиле, ки иқомат дорад ва ба ҳар манзили дигаре, ки меҳмонӣ меравад, маскани кору фаъолияти хизматии ӯст, саҳро, ки он ҷо заҳмати киштукорашро анҷом медиҳад, барои сарфаи вақт метавонад намозҳояшро хонад ва ин амали ӯ тибқи фармудаи Имоми Аъзам (раҳимуҳуллоҳ) раво дониста мешавад ва бинобар ҷой доштани узри шаръӣ намози ҷумъа аз ӯ соқит мегардад. Чунки шариати Ислом дар ҳолатҳои зарурат осониро барои ибодати бандагонаш тавсия медиҳад, дар ин маврид Расули Акрам (с) мефармоянд: “Яссиру ва ло туассиру” – яъне осон бигиред ва сахт нагиред,-омадааст дар матлаб.
Дар шарҳи раёсати Маркази исломӣ зикр шудааст, ки ҳар фарди мусулмон бояд намозро дар масҷид ва ҷойҳои пок гузорад, на дар роҳравҳо ва назди издиҳому ҷойҳои ҷамъиятӣ. Зеро дар кӯчаву роҳравҳо рафтуомади мардум зиёд аст ва эҳтимоли мавҷуд будани ифлосиҳо ҷой дорад. Мо бояд фарҳанг ва маърифати ба масҷид рафтан ва иштирок дар намози ҷумъа ва дигар намозҳоро риоя кунем, то ин ки ибодати анҷомдодаамон мақбули даргоҳи илоҳӣ шавад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
