Раиси палатаи поёнии парлумони Тоҷикистон Шукурҷон Зуҳуров имрӯз аз фаъолияти Хадамоти зиддиинҳисории Тоҷикистон шадидан интиқод кард.
Ӯ изҳор намуд, ки Хадамоти зиддиинҳисорӣ бо фармоиши бемулоҳизаи худ дар бораи боло бурдани тарифҳо барои корбарони интернет ҷомеаи кишварро ба ҳаяҷону изтироб овард.
“Шумо бо қарори бемулоҳизаи худ муддати як моҳ Тоҷикистонро “қаҳрамони асосӣ"-и ВАО-и ҷаҳон карда, сарвари давлатро дар вазъи ногувор гузоштед”, – иброз дошт ӯ.
Бино ба гуфтаи Зуҳуров, пеш аз боло бурдани нарх ба ин ё он хизматрасониҳо, “бахусус дар бахши иҷтимоӣ”, вазорату идораҳои кишварро зарур аст, ки чуқуру мулоҳизакорона андеша ронанд.
“Вақте ки Тоҷикистон давлати рушдёфтаву доро шуда, аҳолиаш бе мушкилӣ зиндагӣ дошта бошад, пас метавон бепоён нархҳоро боло бурд, лекин айни замон мо чунин имкон надорем”, – илова намуд раиси палата поёнии парлумон.
Ёдрас мекунем, ки мувофиқи фармоиши Хадамоти зиддиинҳисории №31 аз 4 марти соли 2019, аз 18 апрел барои ҳамаи ширкатҳои мобилии Тоҷикистон ҷадвали тарифҳои ягона барои хизматгузориҳои мобилӣ ҷорӣ шуд.
Хадамот ширкатҳои мобилиро ба муқаррар намудани нархи 1 Мб интернет на камтар аз 5 дирам бе назардошти андозҳо уҳдадор кард. Ҳамин тариқ, нархи 1 гигабайт (1024 мегабайт) интернети ширкатҳои мобилии Тоҷикистон мебоист аз 30-35 сомонии арзиши пештара то ба 63 сомонӣ боло мерафт.
Вокуниши ҷомеа ба ин амал дер напоид. Аҳолӣ ва намояндагони ҷомеаи шаҳрвандӣ, ҳамчунин коршиносону мутахассисони соҳа яктан дар бораи нодуруст будани ин фармоиш садо баланд карданд, аммо кормандони Хадамот онро чунин шарҳ доданд, ки даромади ширкатҳои мобилӣ аз зангҳои байнулмилалии овозӣ кам шуда, ин дар навбати худ ба коҳиши воридоти маблағҳо ба буҷет боис гардидааст.
Кор то амалҳои фаъол – ҷамъоварии имзо алайҳи фармоиш бо дархости ба масъала дахолат кардани президенти ҷумҳурӣ расид. Лекин то ирсоли ин муроҷиатнома Президенти Тоҷикистон Эмомалӣ Раҳмон фармоиш дар бораи гароншавии тарифҳоро бекор кард.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
