Раиси вилояти Хатлон Қурбон Ҳакимзода зимни суханронӣ дар ҷаласаи тантанавӣ ба муносибати 27-солагии Артиши миллии Тоҷикистон изҳор дошт, ки дар мавсими даъвати ҷавонон ба сафи Қувваҳои мусаллаҳи кишвар “дар иҷрои нақша ба мушкилӣ рӯ ба рӯ мешавем”.
“Ин аз он шаҳодат медиҳад, ки ҳоло ҳам дар шаҳру ноҳияҳои вилоят корҳои тарғиботӣ дар байни ҷавонони синни даъват хуб ба роҳ монда нашудааст. Дар раванди таълими ватандӯстии ҷавонон, ки як рукни асосии консепсияи миллии тарбия мебошад, ҳанӯз ҳам камбудиҳои зиёд ҷой доранд. Бинобар ин, ҳар яки моро зарур аст, дар тарбияи миллии насли наврас ва бедор кардани ҳисси худшиносии ҷавонон саҳм дошта бошем. Дар ин самт бояд ҳамкорию ҳамоҳангӣ байни сохторҳои ҳарбӣ бо муассисаҳои таълимӣ ва соҳаи кор бо ҷавонон ва варзиш хуб ба роҳ монда шавад, зеро хизмат ба Ватан қарзи фарзандии ҳар як ҷавонмард аст”, – изҳор дошт раиси вилоят.
Ҳакимзода таъкид кард, ки баҳри омодабошии ҷавонон ба Қувваҳои мусаллаҳи кишвар корро дар муассисаҳои таълимӣ дуруст ба роҳ монда, дарсҳои ибтидоии ҳарбӣ самаранок гузаронида шавад.
Ӯ ҳамчунин гуфт: “Яке аз вазифаҳои дигари мо ин таъмини моддию техникӣ ва ба талаботи замони муосир ҷавобгӯ кардани ҷузъу томҳои кишвар аст. Имрӯз Қувваҳои мусаллаҳи кишвар бо техникаю таҳҷизоти замонавӣ таъмин гардида, қобилияти ҷангии он ба меъёрҳои байнулмилалӣ мувофиқ карда шудааст”.
Ба қавли ӯ, ки мақомоти иҷроияи ҳокимияти давлатии вилоят ва шаҳру ноҳияҳои он ҳамеша ба сохторҳои низомӣ кумаки худро мерасонанд.
“Ҳукумати вилояти Хатлон тибқи дастуру супоришҳои роҳбари давлат дастгирии ҷузъу томҳои ҳудуди вилоятро яке аз самти кори худ дониста, вобаста бо имкониятҳои мавҷуда барои фароҳам овардани шароити мусоид чора меандешад. Аз ҷумла, мақомоти иҷрояи ҳокимияти давлатии вилоят ба сохторҳои низомии вилоят 50 гектар замин ҳамчун хоҷагии ёрирасон ва дар ду соли охир ба 100 нафар хизматчиёни сохторҳои қудратӣ заминҳои наздиҳавлигӣ ҷудо кардааст. Аз тарафи мақомоти иҷроияи ҳокимияти давлатии вилоят ва шаҳру ноҳияҳо дар ду соли охир бо мақсади таъмиру барқарор кардани биною иншооти сохторҳои низомӣ, барои сохтмони кӯдакистон барои фарзандони хизматчиёни ҳарбӣ, сохтмони роҳҳо, кашидани хатти барқ ба дидбонгоҳҳои сарҳадӣ ва расонидани кумакҳои моддӣ зиёда аз 3,5 миллион сомонӣ ҷудо шудааст”, – қайд кард Ҳакимзода.
Вай афзуд, ки бо мақсади баланд бардоштани руҳияи ватанпарастии аскарону афсарони Қувваҳои мусаллаҳ дар арафаи иду ҷашнҳои миллию давлатӣ барои онҳо дастурхони идона ороста мешавад.
Ӯ дар ҷамъбасти суханронӣ аскарону афсарони Қувваҳои мусаллаҳ, сохторҳои ҳифзи ҳуқуқ, нафақахӯрони соҳа ва тамоми мардуми вилоятро бо ин ҷашн таҳният гуфта, таъкид кард: “Осудагии падару модарон, осмони софу беғубори Ватан заҳмати шабонарӯзии шумост. Умед дорам, ки тамоми қувва, донишу малакаи худро баҳри содиқона хизмат кардан ба Ватану миллат ва тамоми тоҷикистониён сарф хоҳед кард”.
Дар фарҷоми ҷаласа раиси вилоят ба як гурӯҳ афсарони сохторҳои қудратӣ, собиқадорон ва оилаҳои онҳое, ки дар рафти адои хизмат ҷони худро аз даст додаанд, ифтихорнома ва кумакҳои пулӣ тақдим кард.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
