Имрӯз Президенти Тоҷикистон Эмомалӣ Раҳмон бо Президенти Беларус Александр Лукашенко суҳбати телефонӣ анҷом дод.
Бино ба иттилои хадамоти матбуоти сарвари давлат, дар рафти суҳбати телефонӣ Эмомалӣ Раҳмон президенти Беларус Александр Лукашенкоро ба муносибати зодрӯзаш самимона табрику муборакбодӣ кард.
Гуфта мешавад, дар чорчӯбаи суҳбат ҷонибҳо як қатор масъалаҳои рӯзмарра, аз ҷумла вазъи имрӯзаи Беларус ва ҳолати кунуниву дурнамои муносибатҳои дӯстиву ҳамкориҳои барои ҷонибҳо судманди Тоҷикистону Беларусро мавриди баррасӣ қарор доданд.
“Дар ин зимн Пешвои миллат дастовардҳои назарраси Ҷумҳурии Беларусро тайи давраи соҳибистиқлолӣ дар роҳи рушд ва бунёди давлатдорӣ қайд карда, ба мардуми дӯсти Беларус сулҳу суботи пойдор, некӯаҳволӣ ва пешрафти босуботи минбаъдаро орзу намуд”, – қайд мешавад дар хабар.
Ҳамчунин, аҳаммияти рушди беш аз пеши ҳамкориҳои созандаи Тоҷикистон ва Беларус дар ҳамаи соҳаҳои мавриди таваҷҷуҳи тарафайн қайд карда шуд ва Президентҳо рағбати худро ба таҳкиму тавсеаи ҳамаҷонибаи онҳо бар нафъи мардумони ду кишвар таъкид намуданд.
Дар ҳамин ҳол, тавре “Медуза” хабар медиҳад, 30 август дар ҷашни 66-солагии Александр Лукашенок эътирозгарон ба кӯчаҳои шаҳрҳои Беларус баромаданд.
Тибқи арзёбии журналистон, дар гирдиҳамоиии Минск даҳҳо ҳазор нафар ҳузур доштанд. Сохторҳои қудратӣ пеши роҳи онҳоро баста, гирду атрофи қароргоҳи Лукашенко ба иҳота гирифта шуд ва худи ӯ боз автомат ба даст гирифт.
Қатори эътирозгарон ба назди Кохи истиқлолият туҳфаҳои худро ба ҷашни зодрӯзи Лукашенко оварданд, ки аз нонхӯрак (таракан)-и бузург ва тобут барои диктатура иборат буд.
Ҳамчунин онҳо бори дигар аз Александр Лукашенко даъват намуданд, ки аз мансабаш даст кашад.
Дар Беларус ду ҳафта инҷониб муқовимат байни сохторҳои давлатӣ ва тазоҳургарон идома дорад. Тазоҳургарон ғалабаи президенти аллакай чоряк аср ҳукмронидоштаро эъироф намекунанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
