Эшони Сироҷиддин, руҳонии маъруф ва хабарсози тоҷикро дубора барои 5 солу 6 моҳ равонаи зиндон карданд. Ҳукми ӯро имрӯз додгоҳи Исмоили Сомонии шаҳри Душанбе содир кардааст. Дар ин бора як манбаъ аз Додгоҳи шаҳри Душабе ба "Азия-Плюс" хабар дод.
"Парвандаро додгоҳи ноҳияи Исмоили Сомонӣ баррасӣ кардааст. Сироҷиддин Абдураҳмоновро, ки дар дар доираҳои динӣ ҳамчун Эшони Сироҷиддин маъруф аст, бар асоси моддаи 307, прим 3 банди 2-и Кодекси ҷиноятии ҶТ – Ташкили фаъолияти ташкилоти экстремистӣ (ифротгароӣ) муҷрим шинохтаанд",-гуфт манбаъ.
Бино ба иттилои манбаъ, Эшони Сироҷиддинро дубора барои салафигарӣ ва ё таблиғи ҳаракати Салафия, ки дар Тоҷикистон мамнуъ эълон шудааст, равонаи зиндон карданд. Ин манбаъ мегӯяд, ки хулосаи ташхиси динӣ нишон додааст, матолибе, ки Эшони Сироҷиддин дар шабакаи Ютуб мекоридааст, хусусияти ифротгароӣ доштаанд.
Манбаъ аз додани ҷузъиёти дигари ин ки чӣ гуна Эшони Сироҷиддин дигарбора ба салафия гароид, худдорӣ кард. Вале моддае, ки ӯро бар асоси он муҷрим шинохтаанд, чунин пешбинӣ мекунад: "Иштирок дар фаъолияти ҳизбҳои сиёсӣ, иттиҳодияҳои ҷамъиятӣ, дини ё дигар ташкилоте, ки нисбати он аз ҷониби суд қарори эътибори қонунӣ пайдокарда дар бораи барҳам додан ё манъи фаъолияташ бинобар сабаби ба амал баровардани фаъолияти экстремистӣ қабул шудааст, инчунин мусоидат кардан ба фаъолияти онҳо бо истифода аз воситаҳои ахбори омма, шабакаи интернет ва ё ба тарзи дигар".
Хабари дубора боздошт шудани Эшони Сироҷиддин дар оғози ноябри соли гузашта расонаӣ шуда буд, ки гуфта мешуд, дар маҳаллаи Зарафшони Душанбе аз сӯйи кормандони ниҳодҳои қудратӣ бо худ бурда шудааст. Он вақт гуфта мешуд, ки ҳамроҳ бо ӯ блогнавис ё муҷрии блоги "Садои умед", ки дар он Эшони Сироҷиддин ба суолҳои динӣ посух медод, боздошт шудааст.
Ҳоло сарнавишти ин блогнавис маълум нест, ки оё ҷазо гирифтааст ё не. Вале манбаъи "Азия-Плюс" гуфт, ки дар боздошт қарор дорад.
Шабакаи "Садои умед" дар Ютуб аз 12 ноябр ба ин сӯ дигар маводе нагузоштааст.
Пештар Эшони Сироҷиддин барои 7 сол равонаи зиндон шуда буд, ки он замон ӯро расман ба салафигарӣ ва раҳбари ғайрирасмии ин ҳаракат дар Тоҷикистон гунаҳкор карда буданд. Ба дунболи ӯ дар соли 2009 гуруҳи калони ҷонибдоронаш низ боздошт шуда буд, ки дар шумори онҳо писари ӯ Киромиддин Абдураҳмонов низ буд.
Аммо соли 2013 Эшони Сироҷиддинро ғайриинтизор афв карданд, ки баъдан дар наворҳое, ки дар шабакаҳои интернет нашр мешуд, ӯ гуфт, ки пойбанд ба мазҳаби ҳанафӣ аст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
