Муҳоҷирон метавонанд саволҳои тахминиро, ки ба онҳо ҳангоми имтиҳонҳо аз забони русӣ, таърих ва қонунгузории Русия дода мешаванд, пешакӣ фаҳманд. Имтиҳонҳо хаттианд, аммо онҳое, ки мехоҳанд дар Русия муддати тӯлонӣ бимонанд, бояд қобилияти муошират (гуфтугӯ) бо забони русиро нишон диҳанд. Тартиби нави санҷиши дониши муҳоҷирон дар се қарори ҳукумат, ки аз 1 август эътибор пайдо кардааст, муайян шудааст, менависад "Парламентская газета".
Бидуни гувоҳнома (сертификат) дар бораи супурдани имтиҳон гирифтани патенту Иҷозаи зисти муваққатӣ (РВП) ва Ҳуҷҷати иҷозаи зист (ВНЖ) ғайриимкон аст. То ин дам дар танзими баргузории санҷишҳо мақомоти минтақавӣ иштирок мекарданд. Аммо аз 7 июн қонуне эътибор пайдо кард, ки дар он ягона кардани қоидаҳо дар саросари кишвар пешбинӣ шудааст. Минбаъд вазифа ва нархҳо, инчунин рӯйхати ташкилотҳое, ки метавонанд имтиҳон супоранд, дар сатҳи федералӣ тасдиқ карда мешаванд.
Дар яке аз қарорҳо тарзи (методология)-и ҳисоб кардани арзиши имтиҳон муайян ва инчунин нархҳои ҳадди аксар (ниҳоӣ) нишон дода шудаанд. Ба ин тариқ, санҷиш барои онҳое, ки мехоҳанд патент ё иҷозатномаи кор гиранд, аз 3800 рубл зиёд буда наметавонад. Онҳое, ки мехоҳанд Иҷозаи зисти муваққатӣ (РВП) ва Ҳуҷҷати иҷозаи зист (ВНЖ) гиранд, на бештар аз 5900 рубл пардохт мекунанд.
Қарори дуюм тартиби гузаронидани имтиҳонҳоро танзим мекунад. Муносибати дифференсиалӣ (гуногун) ба супоришҳо нигоҳ дошта шудааст: мураккабии онҳо аз ҳадафҳое, ки хориҷиён ба Русия омадаанд, вобаста аст. Муҳоҷирони корӣ аз забони русӣ хаттӣ, аниқтараш, дар компютер имтиҳон месупоранд. Боқимондаҳо низ бояд аз марҳилаи шифоҳӣ гузаранд. Сӯҳбат то 10 дақиқа давом мекунад. Ин қисми санҷиш дар видео сабт карда мешавад.
Саволҳо дар саросари кишвар мувофиқи меъёр ва муқаррарӣ хоҳанд буд. Талабот ба сохтор ва мундариҷаи онҳо, инчунин маҷмӯи вазифаҳо аз ҷониби Вазорати маориф ва илм муайян карда мешаванд. Онҳо ҳар сол нав шуда, дар сомонаи мақомот дастрас хоҳанд буд. Илова бар ин, ҳар як ташкилоте, ки имтиҳонҳоро қабул мекунад, уҳдадор аст, ки хориҷиёнро бо намунаи саволҳо пешакӣ шинос кунад.
Имтиҳони сатҳи гирифтани Иҷозаи зисти муваққатӣ (РВП) ва Ҳуҷҷати иҷозаи зист (ВНЖ)-ро комиссияе қбаул мекунад, ки ба он омӯзгорони бахши забоншиносӣ, фанҳои филологӣ, таърих ва ҳуқуқшиносӣ шомиланд. Илова бар ин, комиссияҳои ҳалли баҳсҳо таъсис дода мешаванд ва хориҷиёне, ки аз имтиҳон нагузаштаанд, метавонанд ба он муроҷиат намоянд. Дар он ҷо инчунин метавон аз қонуншиканӣ дар тартиби баргузори имтиҳон шикоят бурд.
Барои муҳоҷирони маъюб комиссияҳо вазифадоранд шароити муносиб фароҳам оранд, то вазъи саломатӣ ба супоридани имтиҳон барои шахс монеъ нашаваду ӯ аз имкони вуруд ба Русия маҳрум нашавад.
Гувоҳномаҳои муваффақона супоридани имтиҳон дар феҳристи федералии ҳуҷҷатҳои таҳсил сабт карда мешаванд. Моҳи июн як қарори ҳукумат мавриди амал қарор гирифт, ки мувофиқи он, мӯҳлати амали гувоҳномаҳо барои гирифтани Ҳуҷҷати иҷозаи зист (ВНЖ) ба мӯҳлати номаҳдуд ва ҳама дигар боқимонда – се сол эътибор дорад.
Боз дар як қарори дигари ҳукумат пешбинӣ шудааст, ки маводи имтиҳонот дар давоми се сол аз замони додани гувоҳнома нигоҳ дошта шуда, сипас нобуд карда мешаванд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
