Фарроши 53 солаи мактаби Унҷии ноҳияи Бобоҷон Ғафуров бегоҳии 2-уми октябр ҳангоми бозгашт аз пахтачинӣ вафот кард. Мақомот гуфтанд Раҳбар Собирова аз бемории қалб вафот кард, аммо ҳамкоронаш мегӯянд, ӯ боре ҳам аз саломатияш шикоят накардааст.
Дилбар Бобоева, мудири Шӯъбаи маорифи ноҳияи Бобоҷон Ғафуров дар суҳбат ба “Азия-Плюс” гуфт, Роҳбар ҳамроҳи гурӯҳе аз фаррошон ихтиёрӣ ба пахтачинӣ рафта буд, он рӯз ӯ ҳудуди 80 килограм пахта чидааст ва аз саломатияш шикоят надошт.
Вай афзуд, баъди марги ин фарроши мактаб "назорат дар мавриди сафарбар кардани омӯзгорон ба пахтачинӣ то ҷое ҷиддитар шудааст".
“Рафтан ба пахтачини маҷбурӣ не, бо хоҳиши худи омӯзгорон аст. Ин ҳодиса зери назари қатъии раиси ноҳияи Бобоҷон Ғафуров гирифта шуд. Раис гуфтанд бубинед, агар кас каме бемадор ҳам бошад, маҷбурӣ ба пахтачинӣ наравад. Касе хоҳишманд аст, равад, дигар маҷбур накунед гуфтанд”.
Раҳбар Собирова дар мактаби рақами 27-и ҷамоати Унҷии ноҳияи Бобоҷон Ғафуров панҷ соли охир фаррошӣ мекард. Директори мактаб Абдулаким Ахмедов гуфт, ӯ қаблан аз саломатияш шикояте надошт ва солим буд. Ба нақли директори мактаб, Собирова дар ҳамҷоягӣ бо 8 нафар омӯзгорон барои 10 рӯз ба хоҷагии ба номи "Қушшато" ба пахтачинӣ рафта буд. Ва баъди маргаш ҳамаи омӯзгоронро аз саҳро ба хона овардаанд.
“Ин кас фаррош буданд, баъди 8 рӯзи пахтачинӣ ҳангоми бозгашт аз майдони пахта дар роҳ ба бошишгоҳ дилашон якбора аз кор мемонад ва мефавтанд. Он шаб кормандони мақомот низ санҷиданд, хуллосаи тиббӣ ҳамин бемориро нишон дод. Дар марги Собирова дигар ягон сабаб вуҷуд надорад, ин ҳодисаи ногаҳонӣ аст. Аммо пештар боре ҳам шикоят аз бемории қалб надоштанд”, – гуфт директор.
То ҳол дар мавриди марги Раҳбар Собирова назари пайвандонаш дастрас нест.
Ин дар ҳолест, ки давоми як моҳи охир алакай ин дуюмин ҳодисаи фавт дар майдони ҷамъоварии пахта аст. Бегоҳии 14-уми сентябр Меҳронаи Фурӯзон як хонандаи синфи 9-и мактаби рақами 2 ноҳияи Зафаробод дар майдони пахтазор зери чархи трактор монда ҷон бохт. Пайвандони ин духтар дар ин ҳодиса соҳибони замин ва омӯзгоронро айбдор медонанд, ки маҷбуран хонандагонро ба пахтачинӣ бурдаанд. Аммо Вазорати корҳои дохилии Тоҷикистон дар шарҳи ҳодиса ба “Азия-Плюс” гуфт ин “Айби худаш! Дар ин ҳодиса таркиби ҷиноят нест ва барои ҳамин парвандаи ҷиноятӣ боз намешавад”.
Аммо Гулсара Назиров, модари Меҳронаи Фурӯзон мегӯяд, барои таҳқиқи марги духтараш ба мақомоти додситонии ноҳияи Зафаробод ва вилояти Суғд муроҷиат кардааст ва талош дорад ҳодиса одилона санҷида шавад ва омилони марги духтараш ҷазо бинанд.
