Президенти Тоҷикистон Эмомалӣ Раҳмон бояд ба ташкили ҳукумати фарогир дар Афғонистон мусоидат намояд.
Тавре хабаргузории “Красная Весна” бо истинод ба Sputnik Афғонистон иттилоъ медиҳад, дар вохӯрӣ бо собиқ волии вилояти Ҳироти Афғонистон Исмоил-Хон пешвои Ҷабҳаи муқовимати миллии Афғонистон Аҳмад Масъуди хурдӣ чунин изҳори андеша кардааст.
Ин вохӯрӣ рӯзи 6 ноябр дар шаҳри Машҳади Эрон баргузор шудааст.
Дар ҳамин ҳол, Забеҳуллоҳ Муҷоҳид, сухангӯйи ҳукумати "Толибон ба Радиои Афғонистони Озод гуфтааст, “Толибон” дар ҷустуҷӯи робитаи нек бо ҳамаи ҳамсояҳо, бахусус Тоҷикистон, аст.
"Ҳукумати мо мехоҳад, бо ҳама ҳамкор бошад, чи дар бахши иқтисод ва чи дар бахши ҳамлу нақл ва рафтуои афғонҳо. Бахусус бо Тоҷикистон мехоҳад, равобити хуб дошта бошад, аз ҷумла дар соҳаи тиҷорат ва бахшҳои дигаре, ки он кишвар нигаронаш аст", – иброз доштааст вай.
Тибқи маълумоти расмӣ, ҳаҷми савдои дуҷониба байни Тоҷикистону Афғонистон давоми моҳҳои январ-сентябри соли равон 76 млн 700 ҳазор долларро ташкил додааст.
Тоҷикистон ягона кишваре дар Осиёи Марказӣ аст, ки нисбат ба Толибон мавзеъгирии оштинопазир дорад. Эмомалӣ Раҳмон, раисҷумҳури Тоҷикистон, аз Толибон барои нодида гирифтани ҳуқуқи тоҷикони Афғонистон интиқод кард ва гуфт, танҳо аз таъсиси ҳукумати фарогир дар ин кишвар ҳимоят мекунад.
Ёдовар мешавем, ки масъалаи ташкили ҳукумати фарогир дар Афғонистонро, ки ба ҳайаташ бояд тоҷикону ҳазораҳо ва ӯзбекон дохил шаванд, Эмомалӣ Раҳмон рӯзи 17 сентябр дар мулоқот бо нахуствазири Покистон Имрон Хон дар Душанбе матраҳ карда буд.
Маҳз ҳамон вақт президенти Тоҷикистон изҳор дошта буд, ки дар ташкили музокироти намояндагони муқовимат ва Толибон дар Душанбе кумак хоҳад кард, аммо ин иқдом то кунун сурат нагирифтааст.
Илова бар ин, Эмомалӣ Раҳмон рӯзи 23 сентябр зимни суханронӣ дар иҷлосияи 76-уми Маҷмаи Умумии СММ хостори баргузории интихобот дар Афғонистон ва таъсиси як ҳукумати фарогир бо ширкати намояндагони тамоми қавмҳо, аз ҷумла тоҷикони афғон шуд.
Ба ақидаи ӯ, бидуни ба инобат гирифтани манофеи кулли сокинони Афғонистон таъсиси ҳар як ҳукумат метавонад барои ӯ паёмадҳои фалокатбор оварад. Раҳмон он замон аз хатари эҳёи терроризми байналмилалӣ дар қаламрави Афғонистон ҳушдор дод.
Қаблан дар мусоҳиба бо хабарнигори ТАСС собиқ муовини волии вилояти Панҷшер Кабир Восиқ қайд карда буд, ки ҷабҳа бо Тоҷикистон, ки «ба мардуми афғон дар мубориза бо Толибон ҳамеша кумаки назаррас расонидааст ва ҳозир низ ёрӣ мерасонад”, равобити хуб дорад.
Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
