Маркази беҳдоштӣ ё СЭС-и вилояти Суғд моликони тӯйхонаву тарабхонаҳоро ҳушдор додааст, ки минбаъд соҳибони тӯй ва меҳмонони онҳоро танҳо бо доштани гувоҳномаи воксин шудан дар баробари COVID-19 ба ҷашну маъракаҳо иҷозат диҳад. Дар сурати риоя накардани ин талабот гуфта мешавад, нисбати моликони тарабхонаву тӯйхонаҳо чораҳои махсус то манъи фаъолияташон андешида мешавад.
Таҳмина Усмонова, сардори Маркази беҳдоштии вилояти Суғд дар ин бора дар як мулоқот бо рӯзноманигорони шаҳри Хуҷанд изҳори назар кардааст. Тавре телевизиони маҳаллии “Азия” ба нақл аз Таҳмина Усмонова дар гузорише гуфтааст “аз ин баъд касоне, ки дар тӯю маъракаҳо ширкат меварзанд бояд бо худ гувоҳномаи ваксинатсияро дошта бошанд. Дар сурати надоштани гувоҳнома роҳбарони базмгоҳҳо муҷозот хоҳанд шуд”.
Ҳамчунин ин ниҳод ба ҳама моликони тӯйхонаву тарабхонаҳо мактуби фаврие ирсол кардааст.
“Тамоми меҳмононе, ки мисол 100 нафар бошанд, бояд бо гувоҳнома оянд. Ин ҳатман аз ҷониби кормандони беҳдоштӣ ва нозирони минтақавӣ назорат бурда мешавад. Нисбат ба он тӯйхонаҳое, ки ин меъёрро ҷорӣ намекунанд, ҳатман чораҳои ҷаримабандӣ то манъи фаъолияти онҳо андешида мешавад”.- гуфтааст Таҳмина Усмонова.
Ҷалби аҳолӣ ба воксинзанӣ дар вилояти Суғд сар аз оғози моҳи декабр, баъд аз он пурзӯр шуд, ки бино ба таҳлилҳои вазорати тандурустӣ дарсадии аҳолии воксиншуда дар шимолии Тоҷикистон кам будааст.
Ҳоло бино ба ба иттилои Идораи беҳдоштӣ 50 дарсади аҳолӣ дар Суғд вояи аввал ва 35 дарсад вояи дувуми воксинро задаанд.
Маҷнун Орипов, муовини сардори Маркази беҳдоштӣ дар вилояти Суғд дар суҳбат ба “Азия-Плюс” гуфт, онҳо ба тамоми муассисаву сохторҳо тавсия ва дастур ҳам додаанд, ки бояд аҳолиро барои воксин задан ташвиқ кунанд. Ӯ аз хуруҷи намуди нави омикрони коронавирус дар ҷаҳон нигаронӣ карда, гуфт бояд сироятшавӣ ба онро пешгирӣ кард.
Ба гуфтаи масъулони Идораи беҳдоштии Суғд ба ҷуз воксин задан, ҳамчунин онҳо иҷрои қоидаҳои дигари беҳдоштӣ, аз ҷумла бастани ниқоб, маҳлулҳои зиддиуфунӣ, риояи фосилаи иҷтимоӣ ва ғайраро ҳам талаб мекунанд
Ҳамчунин ба гуфтаи Орипов шахсоне, ки барои табобат дара беморхонаҳо бистарӣ мешаванд ҳатман бояд гувоҳнома дошта бошанд. Ин мақоми тандурустии вилоят мегӯяд, агар бемор гувоҳнома надошта бошад ба беморхонаҳо, чӣ давлативу чӣ хусусӣ бошад, роҳ дода намешавад.
Чанде пеш Бозраси давлатии автомобилии вилояти Суғд ҳам бо нашри як эълон аз мусофирону ронандагоне, ки аз Хуҷанд ба самти Душанбе мехоҳанд сафар кунанд расонид, ки пеш аз сафар воксин зананд ва ё то гирифтани воксин аз сафар ба Душанбе ва минтақаҳои дигари кишвар худдорӣ кунанд.
Ҳамчунин давоми чанд рӯз аст, ки дар шаҳри Хуҷанд аз хонандаҳои мактабҳои миёна талаб карда мешавад, ки нусхаси гувоҳномаеро, ки падару модарашон алайҳи коронавирус воксин задаанд ба мактаб биёранд.
Ҳарчанд вазоратҳои маорифу тандурустӣ талаб кардани нусхаи гувоҳномаро дар мактабҳо рад мекунанд, вале дар шабакаҳои иҷтимоӣ садҳо корбар дар ин бора навиштаанд ва норизоятии худро ҳам баён кардаанд.
Маркази беҳдоштӣ дар вилояти Суғд мегӯяд, онҳо ба ҳама сохторҳо дар вилоят дастур додаанд, ки барои ташвиқи мардум ба воксин задан талош кунанд.
Дар Тоҷикистон, сар аз 24 июн, пас аз ворид шудани воксини CoronaVac чинӣ ба кишвар, дар Душанбе эмгузаронии оммавии шаҳрвандони аз 18-сола боло оғоз шуда, се моҳ қабл қишри осебпазири аҳолӣ, аз ҷумла афроди аз 60-сола боло, ба гирифтани воксини AstraZeneca шурӯъ карданд. Ҳоло дар кишвар ба ҷуз ин ду воксин, ҳамчунин воксинаҳои Pfizer ва Moderna-и амрикоӣ ва “Спутник V”-и русӣ низ дастрасанд.
Дар Тоҷикистон то имрӯз 49, 7 фоиз шаҳрвандон вояи якуми ваксинаи зидди бемории коронавирус ва 42, 5 фоиз ду воя ваксинро гирифтаанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
