Ду ҳафта инҷониб миёни сокинони пойтахт овозаҳо дар бораи пайдо шудани бозингари нав дар бозори хидматрасонии такси – ширкати маъруфи фармоиши такси, хӯрок, молу маҳсулот, расонидани бор ва дигар хидматрасониҳои «Яндекс GO» гаштугузор дорад. “Азия-Плюс” бо ин ширкат тамос гирифт.
Дар мағозаи замимаҳои App Store ва Google Play Market дар бораи рӯйи кор омадани замимаи Яндекс GO дар Душанбе аллакай анонсҳо ҳастанд.
Агар шумо ҳозир замимаи онҳоро дар смартфони худ насб кунед, ҳоло муваққатан ба шумо хидматрасониҳои Яндекс GO-ро пешниҳод карда наметавонанд. Дар қисми поёни замима ба ҷойи аломати “фармоиш” (заказать) навиштаи “Аз вақти ба кор даромадани сервис (хидматрасонӣ) хабар медиҳем” (Сообщим, когда сервис заработает) пайдо мешавад. Тибқи замима, ширкат хидматрасониҳоеро чун “комфортное такси” (таксии бароҳат), мотокурер ва автокурер дар Душанбе роҳандозӣ мекунад.
Дар шабакаҳои иҷтимоӣ, бахусус Instagram, аллакай рекламаи «Яндекс GO Таджикистан» нашр шуда, дар пойтахт баъзан бо таксии рангаш зарди бо варақҳои часпонида аз ин ширкат вохӯрдан мумкин аст. Лекин ҳоло бо рақамҳои Русия.
Онҳо кай дар Душанбе пайдо шуданд?
Мо тавонистем бо намоянда ва масъули рекламаи Yandex GO дар Душанбе тамос бигирем, аммо аз онҳо ба саволҳои мавриди таваҷҷуҳамон посух гирифта натавонистем. Ягона чизе, ки ҳосил шуд, тасдиқи ин маълумот аст.
“Ҳозир мо хидматрасониро дар Тоҷикистон санҷида истодаем. Хабарҳои моро пайгир бошед – ба наздикӣ дар бораи расман ба кор оғоз кардан огоҳ мекунем”, – гуфт ба “Азия-Плюс” масъули рекаламаи ширкати Яндекс GO Элмаз Бархонова.
“Онҳо кори худро дар Тоҷикистон ду моҳ пеш оғоз карданд. Мо таргетҳо, маркетинг, аносҳо ва дигар корҳои онҳоро пайгирӣ дорем. Онҳо аллакай ба қабули кормандон машғуланд. Мегӯянд, ки ҳама метавонанд ба онҳо муроҷиат карда, ба кор гирифта шаванд. Лекин дар куҷо воқеъ будани дафтари корӣ (офис) ва чӣ гуна бо онҳо дар тамос шудан ба ман маълум нест”, – изҳор дошт ба “Азия-Плюс” корманди яке аз ширкатҳои муваффақи таксии пойтахт.
Ронадагони такси ба ин рақиб чӣ назар доранд?
“Азия-Плюс” ба чанде аз ронандагони такси муроҷиат кард, то ки назари онҳоро дар бораи рақиби навашон бифаҳмад. Миёни онҳо касоне ҳам пайдо шуданд, ки бо Яндекс GO дар Русия кор кардаанд.
“Ман бо ин ширкат ба сифати таксирон дар Маскав кор кардаам. Бо онҳо кор кардан осон аст ва ҳолати мошинҳояшон хеле хуб мебошад. Аз онҳо таксиро ба иҷора мегирифтам. Нисбати ронандагон талаботи хеле ҷиддӣ доранд. Масалан, хушмуомилагӣ нисбат ба мизоҷон. Дар баробари ин, агар шумо бо муштарии дағал рӯ ба рӯ шавед, метавонед аз иҷрои фармоиши ӯ даст кашед. Яъне ҳуқуқу манфиатҳои шумо низ риоя мешаванд!”, – гуфт ба “Азия-Плюс” як ронанда бо номи Қурбоншо.
Аз пайдо шудани ширкати нав дар бозори таксии Тоҷикистон ронандаи такси Аминҷон низ хурсанд аст.
“Агар ин ширкати Русия барои ронандагон шароити бештар мусоиду фоиданок ва қулай фароҳам орад, ман ба он мегузарам. Дар бораи онҳо алҳол чизе намедонам, аз ҷумла ба куҷо ва ба кӣ муроҷиат карданро. Танҳо номаш ҳасту овозаҳо дар бораи пайдо шуданаш”, – мегӯяд Аминҷон.
