Дар назди яке аз манзилҳо дар кӯчаи Земскии шаҳри Чехов ҷанҷолу занозанӣ бо истифода аз корд рух дод, ки дар натиҷа 2 нафар аз захмҳои бардоштаашон ҳалок шуданд. Дар ин бора ба ТАСС аз хадамоти матбуоти Сарраёсати ВКД Русия дар вилояти Маскав хабар додаанд.
“Тибқи маълумоти пешакӣ, байни гурӯҳи шаҳрвандон муноқиша сар зада, дар ҷараёни он ду нафар аз корд ҷароҳат бардоштанд ва аз захмҳои гирифтаашон дар ҷойи ҳодиса ҳалок шуданд”, – гуфтааст ҳамсуҳбати хабаргузорӣ.
То ин дам муфаттишон шахсияти яке аз фавтидагонро муайян кардаанд. Ӯ зодаи 28-солаи Тоҷикистон будааст. Шахсияти фавтидаи дуюм ҳоло маълум нест. Мақомоти пулис гумонбарон дар кушторро ҷустуҷӯ дорад, менависад news.ru.
Пас аз рух додани ин ҳодиса Раёсати минтақавии Кумитаи тафтишот дар бораи одамкушӣ парванда боз кардааст.
Бино ба маълумоти ҳоло тасдиқношуда, пеш аз ҳодиса яке аз ҳалокшудагон дар қаҳвахонаи назди маркази савдои “Карнавал” мавриди лату кӯб қарор гирифтааст. Баъдан ӯ қасос гирифтан хоста, ҳаммаслаконашро ҷамъ мекунад, вале ҳалок мешавад.
Тавре ки манбаъҳои “Чехов Вид” хабар медиҳанд, дар ин ҳодиса ҷабрдидаи сеюм ҳам будааст. Барои боздошти ӯ ва гумонбарон дар куштор мақомоти ҳифзи ҳуқуқ ҷангалро аз назар гузаронида, сабтҳои виедоиро аз камераҳои мушоҳидаи берунӣ месанҷанд.
Гуфта мешавад, дар ҷойи содир шудани ҷиноят силоҳи куштор низ дарёфт шудааст, ки ба арматураи дароз монанд аст.
