Ҳар ҳафта дар барномаи “Фурсати донистан”-и радиои “Азия-Плюс” мо бо ҳуқуқшиносон дар мавриди масоили расмиёти маъмурӣ мусоҳибаи ихтисосӣ анҷом медиҳем. Ин бор меҳмони барнома ҳуқуқшиноси маъруф ва вакили дифоъ Иноят Иноятов буд, ки бо Меҳрубон Зокирӣ мавзуи санади маъмурӣ ва шаклҳои онро баррасӣ карданд.
Мафҳуми «санади маъмурӣ» чист ва дар кадом қонун пешбинӣ гардидааст?
Мафҳуми санади маъмурӣ дар моддаи 2 Кодекси расмиёти маъмурии Ҷумҳурии Тоҷикистон шарҳ дода шудааст.
Санади маъмурӣ – санади маъмурӣ ва санади меъёрии ҳуқуқии маъмурӣ мебошад, ки мақомоти маъмурӣ дар асоси қонун ё дигар санади меъёрии ҳуқуқӣ қабул мекунад;
Ҳамчунин қарори қабулнамудаи мақомоти маъмурӣ дар бораи рад намудани қонеъгардонии дархости аризадиҳанда доир ба масъалаҳои марбут ба салоҳияти ин мақомот, инчунин ҳуҷҷати қабул ё тасдиқнамудаи мақомоти маъмурӣ, ки метавонад боиси оқибатҳои ҳуқуқӣ гардад, аз ҷумла сертификат, иҷозатнома, иҷозат ва ғайра, санади маъмурӣ ҳисобида мешаванд;
Санади меъёрии маъмурӣ – санади ҳуқуқии маъмурӣ умумиҳатмие, ки мақомоти маъмурӣ ваколатдор дар асоси қонун ё дигар санади меъёрии ҳуқуқӣ дар асоси он қабулгардида содир намудааст ва қоидаҳои умумии рафтори доимӣ ё муваққатӣ ва истифодаи бисёркаратаро дар бар мегирад, аз ҷумла дастурамал, низомнома, оиннома ва ғайра.
Санади маъмурӣ дар кадом шакл қабул карда мешавад?
Талабот оид ба шакли санади маъмурӣ дар Кодекси расмиёти маъмурӣ Ҷумҳурии Тоҷикистон пешбинӣ шудааст. Санади ҳуқуқии маъмурӣ дар шакли хаттӣ қабул мегардад. Дар ҳолатҳои таъхирнопазир, ки ба амнияти давлатӣ ё ҷамъиятӣ, саломатии аҳолӣ, ҳаёти одамон хатар таҳдид менамояд санади маъмурӣ метавонад дар шакли шифоҳӣ қабул гардад. Бо талаби тарафи манфиатдор, инчунин дар ҳолатҳое, ки санади маъмурӣ ҳуқуқӣ манфиатҳои қонунӣ шахсро маҳдуд месозад, ҳамчунин дар дигар ҳолатҳое, ки қонун пешбинӣ намудааст, санади маъмурӣ шифоҳӣ дар давоми 3 рӯзи баъди қабул шуданаш бояд дар шакли хаттӣ қабул карда шавад.
Дар Кодекси расмиёти маъмурӣ доир ба реквизитҳои санади маъмурӣ чигуна талабот пешбинӣ шудааст? Мундариҷаи санади маъмурӣро кадом талаботҳо ташкил медиҳанд?
Дар моддаи 14 Кодекси расмиёти маъмурӣ Ҷумҳурии Тоҷикистон оиди реквизитҳои санади ҳуқуқии маъмурӣ меъёри ҳуқуқӣ пешбинӣ шудааст. Ҳар як санади ҳуқуқии маъмурӣ бояд реквизитҳои зеринро дар бар гирад:
-номи санади ҳуқуқии маъмурӣ;
-номи мақомоте, ки санади ҳуқуқии маъмурӣро қабул кардааст;
-сарлавҳаи санади ҳуқуқии маъмурӣ;
-ном ва насаб, номи падар ва имзои шахси мансабдори ваколатдор, ки бо мӯҳри нишондори мақомоти маъмурӣ ё шахси мансабдор тасдиқ карда шудааст;
-вақт ва маҳалли қабул;
-рақами бақайдгирие, ки мақомоти санади ҳуқуқии маъмурӣро қабулкарда додааст.
Дар санади маъмурие, ки қонеъ гардонидани дархости аризадиҳандао рад мекунад, бояд мақомоте, ки ба он аз болои санади ҳуқуқии маъмурӣ шикоят кардан мумкин аст, суроғаи он ва мӯҳлати пешниҳоди шикоят (ё даъво) нишон дода шаванд.
Ин матлаб дар ҳамкорӣ бо Ҷамъиятӣ олмонии ҳамкориҳои байналмилалӣ дар доираи лоиҳаи "Шаҳрванд дар расмиёти маъмурӣ ва истеҳсолоти иҷро" омода шудааст.
