Соҳибкори ӯзбекистонӣ Салим Абдувалиев, маъруф ба “Салимбойбача” дар доираи парвандаи вакили фирории порлумони Қирғизистон Эмил Жамгирчиев бозпурсӣ шудааст.
Расонаҳо навиштаанд, ки “Салимбойбача”-ро мақомоти интизомии Ӯзбекистон ва Қирғизистон бозпурсӣ кардаанд.
Мансабдори пешини Пулиси молӣ, вакили кунунии порлумони Қирғизистон Эмил Жамгирчиев ва раиси пешини дастгоҳи президенти он кишвар Бахтибек Калмуродов дар гирифтани пора аз соҳибкор барои ҳалли як парвандаи марбут ба қочоқ муттаҳам мешаванд.
Ахиран хабар дода шуд, ки зидди Эмил Жамгирчиев дар Ӯзбекистон ҳам парвандаи ҷиноӣ боз шудааст.
Раиси Кумисюни вакилони порлумони Қирғизистон Алишер Эрбоев 10 январ ба бахши қирғизии Радиои Озодӣ хабар додааст, ки Жамгирчиев дар Ӯзбекистон ба убури ғайриқонунии марз муттаҳам мешавад.
Додситонии кулли Қирғизистон низ бо айби ҳамсон алайҳи Эмил Жамгирчиев парванда боз кардааст. Кумисюни вакилони порлумони Қирғизистон иҷоза дод, ки Эмил Жамгирчиев ба ҷавобгарӣ кашида шавад.
Ҷаласаи комисия рӯзи 9-уми январ пушти дарҳои баста сурат гирифтааст. Пеш аз шуруъи ҷаласа Жамгирчиев гуфт, ки бо айбҳои нисбаташ эъломшуда розӣ нест ва онҳоро таъқиби сиёсӣ меҳисобад.
Баъди тасмими кумисюни вакилон, муфаттишони Додситонии кулли Қирғизистон талош кардаанд, ки даъватнома барои бозпурсиро ба Жамгирчиев супоранд. Вай вориди яке аз утоқҳо шуда, аз ошёнаи дувум ба ҳавлии порлумон ҷаҳида ва аз тафтишот фирор кардааст.
