Рӯзҳои 13 ва 14-уми июн дар минтақаҳои кӯҳӣ ва доманакӯҳии шаҳру навоҳии тобеи ҷумҳурӣ ва вилояти Суғд эҳтимоли зиёди омадани сел вуҷуд дорад. Дар ин бора Қумитаи ҳолатҳои фавқулода (КҲФ) хабар дода ва аз сокинон тақозо дорад, ки то ҳадди имкон аз сафар ба минтақаҳои хатарнок, ҷамъоварии ҳезум ва гиёҳҳои шифобахш худдорӣ кунанд.
Кумита ҳамчунин аз аҳолӣ даъват кардааст, ки ҳангоми ҳаракат аз тариқи роҳҳи кӯҳиву ағбаҳо эҳтиёткор бошанд.
“Аз аҳолӣ хоҳиш карда мешавад, сари вақт селроҳаҳо, ҷӯву каналҳои назди хонаҳои худро аз ҳар гуна хасу хошоку сангу рег тоза кунанд”, – гуфтааст КҲФ.
Ин ниҳод аз аҳолӣ даъват кардааст, ки дар ҳоли шоҳиди ягон ҳодисаи фавқулода шудан бо телефонҳои 112, 223 13 11: 221 91 19 ва ё 93 880 28 19 занг зада, кумакхоҳӣ кунанд.
Дар ҳамин ҳол, кумита ёриҳои худро ба аҳолии минтақаҳои селзада дар ҳафтаи охирро идома медиҳад.
Аз ҷумла, рӯзи 10 июн кормандони КҲФ ба 290 хонаводаи ноҳияи Варзоб, ки аз сел осеб дидаанд, кумак расондаанд.
“Кормандони Кумита бастаҳои беҳдоштӣ ва ҳаббҳо барои безараргардонии оби нӯшокиро расонданд, ки дар ҳузури комиссияи ноҳиявӣ бо роҳбарии раисони деҳоту ҷамоатҳо тақсим карда шуданд”, – менависад манбаъ.
Имсол моҳи июн дар саросари кишвар миқдори моҳонаи боришоти атмосферӣ аз меъёри иқлимӣ зиёд пешгӯӣ шуда, ҳамчунин баъзан пурзӯр шудани суръати вазиши шамол аз самти ғарб бо чангу ғубор дар назар аст.
Ёдовар мешавем, ки дар натиҷаи боришоти шадиди борон ва омадани селу ярч дар кишвар дар моҳи май ҳаҷми зарар зиёда аз 44 млн сомониро ташкил дод.
КҲФ гуфт, дар натиҷа, 25 манзил осеб дида, 15 хонна пурра вайрон шуданд.
Ғайр аз ин, аз офатҳои табиӣ бинои 6 муассисаи таълимии миёна ва томактабӣ, 260 км роҳҳои мошингард, 27 пул, 15,2 км хатҳои интиқоли барқ, 0,8 км хатҳои алоқа, 87,7 км иншооти соҳилмустаҳкамкунӣ, 92,6 км хатҳои обрасонӣ ва наҳрҳо (каналҳо), 14,7 км селпартоҳо, 2 км шабакаҳои обрасон ва обу корез, 10 пойгоҳи обкашӣ ва иншооти гидротехникӣ ва 1076 га заминҳои кишоварзӣ осеб диданд.
Ба иттилои КҲФ, дар натиҷаи офатҳои табиӣ 137 сар чорвои шохдори калон, 501 сар чорвои майда, 62 паранда, 160 оилаи занбӯрҳо нобуд шуда, ба 26 ҳавзи моҳипарварӣ зарар расид.
