Дастаҳои Суперлигаи Ӯзбекистон ба наздикӣ эълон хоҳанд кард, ки боз бо 3 футболбози мунтахаби Тоҷикистон қарордод бастанд. Дар ин бора рӯзноманигорони Ӯзбекистон хабар медиҳанд.
Ин ҷо дар бораи ҳамлагарон Шериддин Бобоев, Шервони Мабатшоев ва Далер Шарипов сухан меравад. Далер Шарипов ҳоло Ӯзбекистонро тарк накарда (дастаи охиринаш – “Металлург”), 2 нафари дигари дар боло зикршуда аз Лигаи олии Тоҷикистон ба Суперлигаи кишвари ҳамсоя мераванд.
Дастаҳои нави онҳо баъди чанд рӯз расман маълум мешаванд, лекин ба тими “Шӯртан”-и Гузар гузаштани Далер Шарипов дар рӯзҳои наздик аз эҳтимол дур нест.
Қаблан зикр гардида буд, ки нимҳимоятгари тими миллии футболи Тоҷикистон Эҳсони Панҷшанбе ҳамчун футболбози озод ба дастаи Суперлигаи Ӯзбекистон – “Суғдиён”-и Ҷиззах гузаштааст.
Дар “Суғдиён” Эҳсон ҳамроҳи дигар намояндаи мунтахаби футболи Тоҷикистон – ҳимоятгар Зоир Ҷӯрабоев, ки чанде пеш аз тими "Нефтчӣ"-и Фарғона рафт, ҳунарнамоӣ хоҳад кард. Дастаи Суперлигаи Ӯзбекистон – “Суғдиён” мавсими гузаштаро дар зинаи сеюми ин мусобиқа ба поён расонд.
Ёдрас мешавем, ки охирин дастаи Эҳсони Пагҷшанбе “Истиқлол”-и Душанбе буд, ки соли гузашта як ҷо бо ин тим қаҳрамони мусобиқоти Лигаи олии Тоҷикистон ва Суперҷоми кишвар шуд.
Қобили зикр аст, ки Эҳсони Панҷшанбе қаблан дар дастаҳои “Вахш”, “Барқчӣ”, “Истиқлол”, “Навбаҳор” (Ӯзбекистон) ва “Зуб Оҳан” (Эрон) бозӣ кардааст. Ӯ аз соли 2016 дар ҳайати тими миллии Тоҷикистон ҳунарнамоӣ карда, дар 57 бозӣ 5 гол задааст.
“Мо бовар дорем, ки дар ҳайати “Суғдиён” Эҳсони Панҷшанбе ба комёбиҳои нав ноил хоҳад гардид. Ба ӯ дар мавсими нав муваффақият ва пирӯзиҳо орзумандем”, – хабар додаанд дар даста.
Қаблан ҳам дар кишвари ҳамсоя футболбозони тоҷик бозӣ мекарданд ва ҳоло ҳам ба ҳунарнамоӣ дар чанде аз дастаҳои Ӯзбекистон идома медиҳанд.
Ба ҷуз Зоир Ҷӯрабоев ва Манучеҳр Сафаров (“Нефтчӣ”), ҳамчунин Даврон Эргашев (“Бунёдкор” ва “Металлург”), Муҳаммадҷон Раҳимов (“Насаф”), Аҳтам Назаров ва Шаҳром Самиев “Андиҷон”) ва дигарон дар Ӯзбекистон бозӣ мекунанд.
