Бонки сармоягузорӣ ва қарзии Тоҷикистон (ICB) ва Агентии қарзӣ-содиротии Қазоқистон (KAZAKHEXPORT) баҳри рушди шарикии стратегӣ ва ҳамкории дарозмуддат созишномаи ҳамкорӣ имзо карданд.
19 –уми феврали соли 2025 Мирзосафар Сафаров, раиси ҶСП “Бонки сармоягузорӣ ва қарзии Тоҷикистон” ва Сергей Куклин, муовини раиси Раёсати Агентии қарзӣ-содиротии Қазоқистон Созишномаи шарикии стратегӣ ва ҳамкории дарозмуддатро бо ҳадафи таҳкими фаъолияти суғуртаи мизоҷон ва тиҷорату сармоягузорӣ дар Тоҷикистон ва Қазоқистон имзо карданд.
Созишномаи мазкур барои мусоидат ва тавсеаи равобити тиҷории Тоҷикистон ва Қазоқистон тавассути фароҳам овардани дастрасии бештар ба роҳҳои ҳалли маблағгузории тиҷоратӣ барои соҳибкорони ҳарди кишвар нигаронида шудааст.
Гуфта мешавад, ки дар доираи созишномаи баимзорасида таҷриба ва захираҳои ҳарду ҷониб барои дастгирии содиркунандагон ва воридкунандагон истифода шуда, ба тиҷорати фаромарзӣ ва ҳавасмандгардонии рушди иқтисод мусоидат карда мешавад.
“Мо итминон дорем, ки ин созишнома ба ҷомеаи соҳибкории Тоҷикистон ва Қазоқистон таъсири мусбат мерасонад. Зеро он на танҳо дастрасиро ба сарчашмаҳои молиявӣ осон мекунад, балки ба коҳиши монеаҳои тиҷоратӣ, таҳкими робитаҳои иқтисодӣ ва рушди устувори иқтисоди кишварҳо мусоидат менамояд”, – мегӯяд, раиси Бонки сармоягузорӣ ва қарзии Тоҷикистон Мирзосафар Сафаров.
Ӯ таъкид мекунад, ки барои ICB ин ҳамкорӣ як қадами муҳим дониста мешавад, зеро он ба густариши ҳамкориҳои байналмилалӣ ва таҳкими мавқеи Бонк дар сатҳи минтақавӣ мусоидат намуда, барои мизоҷони он роҳҳои нави имконияти рушд ва муваффақиятро боз мекунад.
