Рӯзҳои истироҳатӣ, аз 5 то 7-уми апрел бар асари боридани борони пуршиддат дар як қатор ноҳияҳои куҳии Тоҷикистон хатари омадани сел пешбинӣ мешавад. Дар ин бора Кумитаи ҳолатҳои фавқуллода бо такя ба маълумоти Агентии ҳавошиносии Тоҷикистон иттилоъ медиҳад.
Ба гуфтаи манбаъ, дар ин рӯзҳо дар ноҳияҳои доманакӯҳии вилояти Суғд, баъзе ноҳияҳои тобеи ҷумҳурӣ ва ғарби Вилояти Мухтори Кӯҳистони Бадахшон (ноҳияи Дарвоз) омадани сел дар назар аст.
Ҳамчунин, дар шоҳроҳи Душанбе-Чаноқ хатари тармафароӣ вуҷуд дорад.
Дар робита ба ин, кумита шаҳрвандон ва меҳмонони кишварро ҳушдор медиҳад, ки дар ин рӯзҳо аз сафар ба соҳили дарёву кӯлҳо, саёҳат ва гаштугузорҳои кӯҳӣ худдорӣ кунанд.
“Кумита аз ронандагон хоҳиш мекнад ҳангоми ҳаркат аз тариқи роҳҳои кӯҳӣ, бахусус ағбаҳо эҳтиёт кунанд, фосилаи байни мошинҳоро риоя намоянд. Суръати ҳаракатро боло набаранд”, – огоҳ кардааст КҲФ.
Ҳамчунин, ин ниҳод ба сокинони ноҳияҳои кӯҳӣ тавсия додааст, ки дар ин рӯзҳо ба ҷамъоварии занбӯруғ, растаниҳои шифобахш, ҳезум, моҳидорӣ ва шикор худдорӣ намоянд.
Ёдовар мешавем, ки ҳамасола дар натиҷаи боридани борону барф дар кишвар селу ярч меояд, ки боиси хароб гардидани хонаву дар, боғу киштзор ва дар баъзе ҳолатҳо марги одамон мегардад.
