Дар арафаи Рӯзи ҷаҳонии тандурустӣ, ки ҳамасола рӯзи 7-уми апрел таҷлил мешавад, сокинони кишвар имкон доранд, дар ҳама беморхонаҳо ройгон аз ташхиси тиббӣ гузаранд.
Дар ин бора Вазорати тандурустӣ ва ҳифзи иҷтимоии аҳолӣ хабар дода навиштааст, ки пагоҳ, 5-уми апрел аз соати 8:00 то 12:00 дар ҳамаи муассисаҳои ҷумҳуриявӣ, марказҳои саломатӣ, беморхонаҳои вилоятҳо ва шаҳру ноҳияҳо ташхису машваратҳои ройгон барои шаҳрвандон пешбинӣ шудааст.
Ба таъкиди вазорат, дар ин маърака ташхису табобати гаронарзиш истисно буда, маблағи он пардохт мешавад. Вале гуфта нашудааст, ки "ташхису табобати гаронарзиш" кадомҳоянд.
“Чорабинии расмии Вазорати тандурустӣ ва ҳифзи иҷтимоии аҳолии кишвар бахшида ба Рӯзи умумиҷаҳонии тандурустӣ рӯзи 5-уми апрели соли равон дар «Пажӯҳишгоҳи гастроэнтерологияи Ҷумҳурии Тоҷикистон» бо иштироки роҳбарияти вазорат, устодону профессорон ва мутахассони баландпояи соҳавӣ баргузор мегардад”, – гуфтааст ин ниҳод.
Вазорат аз шаҳрвандон даъват кардааст, аз имконият ва шароити мусоид истифода бурда, вазъи саломатии хешро беҳтар намоянд.
Шикоят аз гарон будани нарх дар ташхисгоҳҳо ва хадамоти тиббӣ дар Тоҷикистон кам нест. Ин маърака солҳои пеш ҳам гузаронида мешуд ва онҳое, ки тавони пардохтро надоранд, дар рӯзи ҷаҳонии тандуруст ба беморхонаҳо мешитофтанд.
Сокинон мегӯянд, чунин маъракаҳо бояд бештар баргузор шавад, зеро аксари мардуми ниёзманд имкони пардохти ташхисҳои тибии гаронарзишро надоранд.
