Дар Тоҷикистон ҳаққи ваколатнома оид ба ҳуқуқи истифода ва ё ихтиёрдорӣ (доверенность)-и мошин ду баробар афзоиш меёбад. Ин тағйиротро ҳукумати ҷумҳурӣ ба порлумон пешниҳод намуд ва Маҷлиси намояндагон онро пазируфт.
Дар асоси лоиҳаи тағйирот ба Қонун “Дар бораи боҷи давлатӣ”, ин навгонӣ ба ҳамаи категорияҳои шаҳрвандон, аз ҷумла хешовандони наздик ва дигар шахсони воқеӣ ва ҳуқуқӣ, рабт дорад.
Тибқи лоиҳа, барои фарзанд, аз ҷумла фарзандхонда, ҳамсар ва падару модар, ҳаққи тасдиқи ваколатнома аз 25% нишондиҳанда барои ҳисобҳо то 50% нишондиҳанда барои ҳисобҳо афзоиш меёбад. Ин маънои онро дорад, ки хароҷот аз 18,75 сомонӣ ба 37,5 сомонӣ мерасад.
Барои бародар, хоҳар, набера, бобо ва бибӣ бошад, ҳаққи ваколатнома аз 50% нишондиҳанда барои ҳисобҳо то 1 нишондиҳанда барои ҳисобҳо афзоиш хоҳад ёфт, ки ин аз 37,5 сомонӣ ба 75 сомонӣ мерасад.
Барои дигар шахсони воқеӣ ва ҳуқуқӣ, ки ваколатномаи ҳуқуқи истифодаи мошинро тасдиқ мекунанд, ҳаққи хидмат аз дукаратаи нишондиҳанда барои ҳисобҳо то чоркаратаи нишондиҳанда барои ҳисобҳо (аз 150 сомонӣ ба 300 сомонӣ) боло бурда мешавад.
Ҳамчунин, барои ҳуқуқи ихтиёрдории мошин, ин пардохт аз 15 нишондиҳанда барои ҳисобҳо то 30 нишондиҳанда барои ҳисобҳо (аз 1 ҳозору 125 сомонӣ ба 2 ҳозору 250 сомонӣ) зиёд мегардад.
Лоиҳаи мазкурро рӯзи 29-уми май ҳукумат мақбул дониста, барои баррасӣ ба порлумон фиристод ва рӯзи 25-уми июн вакилони Маҷлиси намояндагон онро қабул карданд.
Пас аз қабули вакилони Маҷлиси олӣ ва имзо гузондани президенти кишвар, тағйирот дар матбуот чоп шуда, баъди ҳамаи ин марҳилаҳо, ба ҳукми амал медарояд.
Тибқи омори Вазорати нақлиёти Тоҷикистон, ба ҳолати 1 марти соли 2024 дар кишвар расман зиёда аз 666 ҳазор воситаи нақлиёт ба қайд гирифта шудааст, ки қариб ду баробар зиёдтар нисбат ба 10 соли пешин аст.
Аз ҷумла, тибқи маълумоти ин вазорат, шумори мошинҳои сабукрав дар кишвар ҳудуди 587 ҳазор ададро ташкил медиҳад.
