Дар ин бора хабаргузории давлатии ТАСС иттилоъ дода, гуфтааст, ки парвандаро Додгоҳи дуюми ҳарбии ҳавзаи ғарбии Маскав паси дарҳои баста баррасӣ мекунад.
Ба иттилои манбаъ, қазияи мазкур аз ҷониби се додрас баррасӣ мегардад ва барои таъмини амнияти ширкаткунандагони ин раванд чораҳои бесобиқаи амниятӣ андешида мешавад.
Мақомоти Русия мегӯянд, парвандаи ҳамла ба “Крокус сити ҳолл” дар канораи Маскав, ки дар пайи он 149 кас кушта ва садҳо тан захмӣ шуданд, аз 450 ҷилд иборат аст.
Дар ин ҳамла, ки рӯзи 22-уми марти соли 2024 анҷом шуд, 19 нафар, аз ҷумла, аксаран шаҳрванди Тоҷикистон гумонбар дониста мешаванд. Маълум нест, боздоштшудаҳо то куҷо бо вакили дифоъ ва ёрии ҳуқуқии таъмин мебошанд. Шеваи боздошту ба ҳабс гирифтани онҳоро ҳомиёни ҳуқуқи инсон интиқод карданд.
Александр Бастрикин, раҳбари Кумитаи тафтишоти Русия қаблан эълом карда буд, ки дар иртибот ба ҳамлаи террористӣ 27 нафар гумонбар дониста мешаванд.
Бо вуҷуди он ки масъулияти ҳамларо бахши афғонистонии созмони террористии “Давлати исломӣ – Вилояти Хуросон”* ба уҳда гирифт, мақомоти Русия ангушти иттиҳомро ба сӯи Украина дароз карданд. Киев даст доштанашро дар ин ҳодиса рад кард.
Дар бораи ин қазия муфассал дар матлаби “Як сол баъди ҳамла ба “Крокус”. Пайвандони 4 гумонбари асосӣ дар чӣ ҳоланд ва дар бораи фарзандонашон чӣ медонанд?” мутолиа кунед.
*Дар Тоҷикистон гурӯҳи террористӣ дониста мешавад.
