Дар шаҳри Хуҷанд як марди 52-сола ба қатли ҳамнишини 35-солааш бо зарби корд гумонбар мешавад.
Акбар Шарифӣ, сухангӯи Раёсати ВКД дар вилояти Суғд дар барномаи “Милитсия хабар медиҳад” гуфтааст, ҳодисаи охири моҳи август дар маҳаллаи 18-уми шаҳри Хуҷанд рух дода, “сабаби куштор майзадагӣ ва пеш бурдани ҳаёти носилими ҳарду ҷониб мебошад”.
Аз гумонбар Ҷуразода Абдураззоқ ном бурда шуда, худи ӯ мегӯяд, “ғайбату бадгуйии ҳамқадаҳаш боиси адовату бадбинӣ шудааст”.
“Ман ӯро се руз надида будам. Фаҳмам маро ғайбат ва ҳақорат кардааст. Бо қаҳру ғазаб дар дастам корд барои аниқ кардан ба хонааш омадам, дарашро куфтам дарро кушода “барои чи омадӣ?” гуфта дашном дод. Кордро баровардаму ба шикамаш задам ва кордро гирифтаму монда рафтам”, – гуфтааст гумонбар.
Таҳти чӣ шароит сабт шудани ин навор маълум нест.
Ҳоло нисбати Ҷуразода барои қасдан расонидани зарари вазнин ба саломатӣ бо оқибати марг ё моддаи 110 Кодекси ҷиноятӣ парвандаи ҷиноятӣ оғоз шуда, ӯ дар ҳабси пешакӣ қарор дорад.
Ёдовар мешавем ҳамасола дар Тоҷикистон даҳҳо ҳодисаи куштор ба қайд гирифта мешавад. Тибқи иттилои Вазорати корҳои дохилӣ дар ҷумҳурӣ дар шаш моҳи аввали соли равон 28 ҳолати одамкушӣ ва суйқасд ба он сабт шудааст.
