Дар гузориши Барномаи рушди Созмони Милали Муттаҳид (СММ) гуфта мешавад, бар асари оқибатҳои иқтисодӣ ва шиддат гирифтани низоъ дар Ховари Миёна ҳудуди 32 млн нафар дар саросари ҷаҳон метавонанд дар сатҳи фақр қарор гиранд.
Идомаи муқовимат ба даҳҳо миллион одамон дар 62 кишвар таъсир мерасонад. Хавфи ба ин ҳолат дучор шудани кишварҳои Халиҷи Форс, Осиё, Африқо ва ҷазираҳои хурд бештар аст.
Дар Барноми рушди СММ таъкид мекунанд, ки ҳато дар сурати созиши муваққатӣ, буҳрон аз марҳилаи “шадид” ба “тӯлонӣ” мегузарад. То кадом вақте ки ин вазъият боқӣ монад, ҳамон қадар хавфи афзоиши фақру камбизоатӣ афзуда, дар ҳолати манфӣ ҷараён гирифтани вазъият, боз то 32 млн нафар одамон метавонанд дар сатҳи пасттар аз фақр қарор гиранд.
Ҳарчанд зарбаи асосӣ ба кишварҳои бевосита ҷалбшуда ба низои ҳарбӣ ва кишварҳои вобаста ба воридоти нерӯ ва сӯзишворӣ рост ояд ҳам, коршиносон оқибатҳои дарозмуҳлатро барои кишварҳои нисбатан камбизоат ва ҳатто дур аз минтақаҳои даргирӣ пешгӯӣ мекунанд.
“Ҷанг қадам ба қафо аст. Дар ҳафтаҳои башумор он метавонад натиҷаҳои кори чандинсоларо барҳам диҳад. Таҳлили мо нишон медиҳад, ки низоъ дар Ховари Миёна на танҳо ба кишварҳои бевосита ҷалбшуда дахл мекунад, балки бахусус ба онҳое, ки барои мутобиқат ва болоравии нарх ба нерӯ ва ғизо захираҳои кам доранд, зарба мезанад. Онҳо сари интихоб қарор мегиранд: нигаҳдории нарх дар айни замон ё сармоягузорӣ ба тандурустӣ, маориф ва ҷойҳои корӣ дар оянда. Ин қобили қабул нест ва метавон аз он канорагирӣ кард. Тадбирҳои саривақтӣ нақши калидӣ мебозанд”, – изҳор доштааст маъмури Барномаи рушди СММ ва муовини Дабири кулли Созмон Александр Де Кро.
Барои сабуксозӣ ва нармкунии оқибатҳои буҳрон Созмон як қатор тадбирҳо пешниҳод мекунад. Аз ҷумла, ин ҷо сари ҷорисозии пардохтҳои таъинотӣ ва муваққатии пулӣ барои оилаҳои камбизоат ва осебпазир сухан меравад, ки барои ин то 6 млрд доллар маблағ лозим аст.
Ҳамчунин ҷорисозии пардохти кумакпулиҳои муваққатӣ ва додани ваучерҳо ба истифодаи заминавии нерӯи барқ ва газ тавсия дода мешавад.
Дар ҳамин ҳол, дар гузориш даст кашидан аз кумакпулиҳои умумии энергетикӣ, ки нархҳоро аз бозор паст нигоҳ медоранд, пешниҳод мешавад. Чунин тадбирҳо бисёр вақт дар кишварҳои дар ҳоли рушд қарордошта истифода шуда, бештар барои қишри таъмингардидаи аҳолӣ фоидаоваранд ва дар дурнамои дарозмуҳлат аз лиҳози молиявӣ ноустувор ба назар мерасанд.
