Додгоҳ Муҳимҷон Раҳмонов, омӯзгоре, ки аз латукӯб шуданаш аз сӯи бародари яке аз хонандаҳояш шикоят дошт, 1560 сомонӣ (20 нишодиҳанда барои ҳисобҳо) ҷарима кардааст. Миралӣ Орзуев, шахсе, ки омӯзгор аз болояш даъво дошт, 5 шабонарӯз ҳабси маъмурӣ шудааст. Омӯзгор аз ҳукми додгоҳ розӣ нест ва мегӯяд, “тарки соҳа мекунад”.
Муҳимҷон Раҳмонов имрӯз, 4-уми июн дар суҳбат ба “Азия-Плюс” гуфт, ҳукми Додгоҳи ноҳияи Нуробод нисбати ӯ ва Орзуев дирӯз, 3-юми июн содир шудааст. Мақомот дар бораи судури ҳукм расман хабар надодаанд.
Ӯ гуфт, додгоҳ ӯро барои “иҷро накардани ӯҳдадорӣ дар таълиму тарбияи кӯдак” гунаҳор кардааст. Вале ӯ аз ҳукми додгоҳ норозӣ аст ва мегӯяд, аз болои он ба зинаҳои болоии додгоҳ шикоят мекунад.
Раҳмонов ҳамчунин, аз ҳукми додгоҳ нисбати Орзуев розӣ нест ва мегӯяд, ки “ҳукм сабук аст ва бояд ӯ барои ман ҷуброни зарар пардохт мекард”.
“Додситонӣ дар хулосааш гуфтааст, ки дар кирдори Миралӣ Орзуев аломатҳои ҷиноят дида намешавад. Ӯро барои “майдаавбошӣ” – моддаи 460 Кодекси ҳуқуқвайронкунии маъмурӣ гунаҳкор карданд. Дар мурофиа вай гуфт, ки танҳо як шапалоқ задам, дигар ҳамаро рад кард. Дар додгоҳ на мудири шуъбаи маорифи ноҳия ва на намояндагони Вазорати маориф ширкат накарданд”, – таъкид кард омӯзгор.
Назари Орзуев нисбат ба ҳукми додгоҳ ва ҳамин тариқ мавқеи наздикони хонанда дар бораи ин қазия маълум нест. Талоши мо барои маълум кардани назари онҳо натиҷа надод.
Омӯзгор бо таъкид ба вазъи молиаш гуфт, ки ҳоло имкони супоридани ҷаримаро надорад ва аз додгоҳ хостааст, ки то гирифтани маош барояш муҳлат диҳанд. Вале аз додгоҳ гуфтаанд, ки 10 рӯз фурсат дорад, то ҷаримаро супорад, вагарна бо гузашти ин муҳлат барои ҳар рӯзи таъхир маблағ зиёд мешавад.
Омӯзгор пештар гуфта буд, ки рӯзи 2-юми июн, ба кор дар мактаб оғоз кардааст, аммо барои 15 рӯзе, ки дар пайи табобат набуд, барояш маош пардохт накардаанд.
Муҳимҷон Раҳмонов мегӯяд, баъди ҳукми додгоҳ “дилам аз касби омӯзгорӣ сард шуд, мехоҳам моҳи оянда аз кор истеъфо диҳам ва ҳамин тариқ, тарки соҳа кунам”.
“Вақте дар курс панҷум мехондам ва ба мактаб таҷрибаомӯзӣ омадам, дастамро рӯйи Конститутсияи Тоҷикистон гузошта қасам ёд карда будам, ки содиқона хидмат мекунам. Вале дилам монд, мехоҳам комилан тарки омӯзгорӣ кунам. Тавре мардум дар шабакаҳои иҷтимоӣ навиштанд “дар охир омӯзгорро гунаҳкор мекунанд” воқеан дуруст баромад”,-таъкид кард омӯзгор.
Номбурда нигаронӣ кард, ки Вазорати маориф ва илми кишвар, ки қаблан мегуфтанд, ӯро танҳо намегузоранд, дар рафти ин қазия вайро умуман дастгирӣ накарданд.
Қазияи латукӯби омӯзгор замоне расонаӣ шуд, ки ӯ бо нашри як навор дар шабакаҳои иҷтимоӣ нигаронӣ кард, ки шаби 8-уми май бародари яке шогирдонаш дар пайи эродгирӣ аз таҳсили хоҳараш ӯро латукӯб ва таҳдиди куштан кардааст. Аз шахси латукӯбкарда Миралӣ Орзуев ном бурд. Вале Орзуев гуфт, омӯзгорро назадааст, балки танҳо суҳбат карданд. Ин қазия боиси баҳс дар ҷомеаву хостори муҷозоти муштзӯр дар шабакаҳои иҷтимоӣ шуд.
Вале ду рӯз пеш омӯзгор гуфт, мақомот дар пайи шикояти Маҳмадризо Орзуев, падари хонандае, ки омӯзгор аз таҳсили ӯ ба бародараш шикоят карда буд, алайҳи худи ӯ парвандаи маъмурӣ ифтитоҳ кардаанд. Ҳамчунин, омӯзгор гуфт, аз ӯ волидайни як хонандаи дигар низ шикоят кардааст. Омӯзгор эътироф кард, ки дарвоқеъ ба духтари Орзуев “танҳо як сухани қабеҳ гуфтам”, вале шикояти волидайни хонандаи дигарро рад мекунад.
Ҷузъиёти бештари ин қазияро дар матлаби “Қабурғаам месӯзад”. Омӯзгоре, ки мегӯяд, аз сӯйи бародари як хонанда латукӯб шудааст, ҷузъиёти қазияро нақл кард” мутолиа кунед.
