Душанбе. 17-уми март. ОИ «Азия-Плюс» – Чанде қабл раиси Палатаи савдо ва саноати ҶТ Шариф Саид ҳайати намояндагони бонку соҳибкорони Латвияро таҳти сарварии сафири ин кишвар Игорс Апокинс ба ҳузур пазируфт.

Чӣ тавре ки аз палатаи мазкур ба ОИ «Азия-Плюс» хабар доданд, ҳайати Латвия ҷиҳати ба Тоҷикистон ворид сохтани таҷҳизот ва технологияи муосир омодагӣ изҳор кардааст.

Ба иттилои манбаъ, намояндагони Латвия барои рушди ҳамкориҳои дуҷониба ифтитоҳи хатсайри мустақими ҳавоӣ миёни кишварҳо, истифодаи контейнерҳои қатора ва ҳаллу фасли масоили раводидро мувофиқи мақсад донистаанд.

Дар навбати худ Шариф Саид меҳмононро мутмаин сохт, ки ҷиҳати ҳалли масоили матраҳшуда ва рушди ҳамкориҳои дуҷониба тамоми кӯшишотро ба харҷ хоҳад дод.

 

           

Душанбе. 17-уми апрелл. ОИ «Азия-Плюс» – Дар ҷараёни баргузории семинари САҲА оид ба мавзӯи муҳоҷирати меҳнатӣ муовини раиси палатаи поёнии парлумони ҷумҳурӣ Шуҷоат Ҳасанова гуфт, то имрӯз аз 180 ҷойи кории пешбинишуда дар Тоҷикистон баҳри пешгирии оқибатҳои бӯҳрони молӣ ҳудуди 30 ҳазор ҷойи корӣ муҳайё карда шуд.

           

Ба гуфтаи ӯ, ҷиҳати дастгирии муҳоҷирони меҳнатии ба ватан баргашта як қатор санадҳои қонунгузорӣ қабул гардида, дар семинар низ пешниҳод оид ба ворид сохтани тағйироту илова ба Қонуни ҶТ «Дар бораи муҳоҷират» садо дод.

Роҳбари Дафтари Созмони Амният ва Ҳамкории Аврупо дар Тоҷикистон Сергей Пряхин гуфт, ахиран дар Тоҷикистон бисёр ярмаркаҳои ҷойҳои кории холӣ ва вазифаҳои озод баргузор мегарданд, ки ҷиҳати пешгирии авҷи бекорӣ дар замони буҳрони молӣ падидаи мусбат аст. Ӯ инъикоси симои манфии муҳоҷири меҳнатӣ дар васоити ахбори умумро ғайримақбул арзёбӣ намуда, изҳор дошт, Дафтари САҲА барои нашри маводи беҳтарин оид ба симои мусбати муҳоҷири меҳнатӣ озмун эълон хоҳад кард.

Душанбе. 17-уми апрел. ОИ «Азия-Плюс» – Чанде қабл мулоқоти раиси Ҳизби наҳзати исломии Тоҷикистон Муҳиддин Кабирӣ бо сафири Фаронса дар Тоҷикистон Анри Зиппер де Фабиани баргузор шуд.

Чӣ тавре ки сухангӯи раиси ҲНИТ Ҳикматулло Сайфуллозода ба ОИ «Азия-Плюс» хабар дод, дар ҷараёни мулоқот сафир ба вазъи мавҷудаи ҳизби ягонаи исломӣ дар минтақа ва муносибати ҳукуматдорон бо он таваҷҷӯҳ зоҳир сохт.

Дар посух раиси ҳизб Муҳиддин Кабирӣ изҳор дошт, ки мушкилоти ҳизб маҳз дар он ифода меёбад, ки он ягонаву танҳо аст. «Аз як тараф, моро ҳукуматдорон танқид мекунанд, ки ҳизб исломро ба ҷомеа таҳмил месозад, аз тарафи дигар, баъзе доираҳо моро ҳизби ғайриисломӣ мехонанд ва ин дар ҳолест, ки ҳизби мо усулҳои демократиро сармашқи фаъолияти худ қарор додааст», – гуфтааст ӯ.

Ҳ.Сайфуллозода афзуд, дар мулоқот ҳамчунин масоили омодагии ҳизб ба интихоботи қарибулвуқӯъи парлумонӣ дар ҷумҳурӣ, таъсири бӯҳрони молӣ ба иқтисоди кишвар ва ғайра мавриди баррасӣ қарор гирифтанд.

Душанбе. 17-уми апрел. ОИ «Азия-Плюс» – Имрӯз дар машқгоҳи низомии Фахробод муддати ду рӯз тибқи нақшаи ягона ва қарори Шӯрои сохтори зиддитеррори кишварҳои узви Созмони Ҳамкории Шанхай, тамринҳои ҳарбии кишварҳои узви иттиҳод таҳти унвони «Норак-Антитеррор» баргузор мешаванд.

Чӣ тавре ки сардори маркази матбуоти Вазорати мудофиаи ҶТ Фаридун Маҳмадалиев ба ОИ «Азия-Плюс» хабар дод, тамринҳо дар ду марҳила баргузор шуда, дар он гурӯҳҳои фаврӣ ва воҳидҳои таъиноти махсуси Қувваҳои Мусаллаҳи Тоҷикистон, Қазоқистон, Қирғизистон, Русия ва Чин ширкат хоҳанд варзид. «Дар тамринҳо аз қувваҳои низомии дифои ҳавоӣ, техникаи зиреҳпӯши вазнин ва аслиҳаву муҳимоти гуногун истифода хоҳад шуд», – гуфт ӯ.

Ф.Маҳмадалиев мегӯяд, ҳадаф аз баргузории тамринҳо ҳамоҳангсозии амалиёти муштараки зиддитеррористӣ, баланд бардоштани савияи тахассусии хизматчиёни ҳарбӣ, табодули таҷриба ва омодагии минбаъда ба мубориза алайҳи терроризми байнулмилалӣ ва ифротгароии сиёсӣ аст.

Душанбе. 16-уми апрел. ОИ «Азия-Плюс» – Дар ҷумҳурӣ барои ҳамаи истифодабарандагон аз моҳи апрел арзиши гази воридотӣ аз Ӯзбекистон ба андозаи 9,8 дарсад боло меравад.

Чӣ тавре ки аз ҶСК «Тоҷиктрансгаз» ба ОИ «Азия-Плюс» хабар доданд, бинобар афзоиши қурби доллари амрикоӣ, ахири моҳи феврал ҳукумат тасмим гирифтааст, арзиши газро афзун созад.

Ҳамин тариқ, шурӯъ аз 1-уми апрели соли ҷорӣ арзиши 1 ҳазор метри мукааби газ барои аҳолӣ беш аз 1 ҳазору 164 сомонӣ ва барои корхонаҳои бузург 1 ҳазору 079 сомониро ташкил медиҳад. «Агар ояндаи наздик қурби доллари ИМА коҳиш ёбад, мутаносибан арзиши газ низ поин хоҳад рафт», – гуфт манбаъ.

Зикр гардид, ки феълан дар як шабонарӯз ба Тоҷикистон аз кишвари ҳамсоя тақрибан 20-212 ҳазор метри мукааб газ ворид мегардад. Қарзи ҷумҳурӣ барои истифодаи газ дар назди Ӯзбекистон ба 16 млн. доллари ИМА баробар аст.

Душанбе. 16-уми апрел. ОИ «Азия-Плюс» – Сафорати Қазоқистон дар Тоҷикистон дар ҳамдастӣ бо созмони ҷамъиятии қазоқони «Байтерек» рӯзҳои 20-22-уми апрели соли ҷорӣ дар шаҳри Душанбе қурултойи хурди қазоқони кишварҳои минтақаи Осиёи Марказӣ, Эрон ва Афғонистонро барпо мекунад.

Чӣ тавре ки аз сафорати Қазоқистон дар Тоҷикистон ба ОИ «Азия-Плюс» хабар доданд, чунин чорабинӣ бори нахуст дар қаламрави кишвари Осиёи Марказӣ доир гардида, дар кори он намояндагони дисапораҳои қазоқ аз кишварҳои минтақа ва Эрону Афғонистон иштирок хоҳанд кард.

Бино ба иттилои манбаъ, рӯзи 20-уми апрел дар чаҳорчӯбаи баргузории чорабиниҳо дар маҷмааи давлатии «Кохи Ваҳдат» бо иштироки намояндагони сохтори давлатӣ, мақомоти маҳаллии ҳокимияти давлатӣ ва намояндагони васоити ахбори умум мизи мудаввар созмон дода мешавад.

           

Душанбе. 16-уми апрел. ОИ «Азия-Плюс» – Кумитаи телевизион ва радиои назди ҳукумати ҶТ омода аст, пешниҳоди расмии мақомоти раҳбарии Ширкати давлатии умумирусиягии телевизиону радио оид ба барқарор сохтани пахши барномаҳои шабакаи телевизиони «РТР-Планета» дар қаламрави ҷумҳуриро мавриди баррасӣ қарор диҳад. Дар ин бора имрӯз зимни нишасти хабарӣ муовини аввали раиси Кумитаи телевизион ва радиои назди ҳукумати ҶТ Абдураҳмон Абдуманнонов хабар дод. «Мо ҳеҷ гоҳ нагуфтаем, ки қарори қатъи пахши барномаҳои ин шабака ниҳоӣ асту дигар сари ин мавзӯъ барнамегардем ва агар аз ҷониби ширкати русиягӣ пешниҳодоти расмиву мушаххас садо диҳад, мо омодаем онро мавриди баррасӣ қарор диҳем», – гуфт ӯ.

           

Дар мавриди шарҳи масъалаи ба кадом шабака додани фазои қаблии пахши барномаи шабакаи телевизиони «РТР-Планета» номбурда гуфт, масъалаи мазкур дар ҳоли баррасист ва хоҳишмандони пахши барномаҳо тавассути он низ мавҷуданд, вале аз ба забон овардани номи аққалан яке аз ин ширкатҳо худдорӣ кард.