Душанбе. 9-уми июн. ОИ «Азия-Плюс» – Тоҷикистон расман Русияро даъват кардааст, ки дар Консорсиюми байнулмилалии сохтмони нерӯгоҳи Роғун ширкат варзад. Охири моҳи май Оқил Оқилов, сарвазири ҶТ, ба унвонии Владимир Путин, раиси ҳукумати Русия, бо ин мазмун мактуб ирсол кардааст. Давлат Назрӣ, сардори Департаменти иттилооти Вазорати корҳои хориҷии ҶТ, дар баробари ин зикр кард, ки «дар мактуб ҷузъиёт ва шартҳои ширкати Русия дар консорсиюм нишон дода нашудааст». Аз рӯи лоиҳа, иқтидори НОБ-и «Роғун» 3,6 ҳазор МВт, истеҳсоли солонаи нерӯи барқ дар он беш аз 14 млрд. кВт/соат аст ва арзиши умумии он $3,4 млрд. мебошад. Айни замон дар ҳаҷми беш аз 40% корҳои сохтмонӣ ба анҷом расидаанд, ки маблағи он 800 миллион долларро ташкил медиҳад. Тибқи лоиҳа, навбати аввали нерӯгоҳ бояд дар муддати 4-4,5 сол ба истифода дода шавад, ки васли ду агрегати он бо иқтидори 800 МВт имкон медиҳад дар як сол то 5 млрд. кВт/соат нерӯи барқ истеҳсол гардад. Бунёди нерӯгоҳи «Роғун» ҳанӯз соли 1976 оғоз гардида буд, вале ба иллати муташанниҷ гаштани вазъи сиёсӣ дар Тоҷикистон, соли 1990 сохтмони он қатъ шуд. Соли 2004 зимни сафари расмии Владимир Путин ба Тоҷикистон перомуни ширкати Русия дар бунёди нерӯгоҳ мувофиқа ҳосил гардида буд. Ширкати «Русский алюминий» бунёди навбати аввали нерӯгоҳро ба ӯҳда гирифт. Аммо «РУСАЛ» ва ҳукумати Тоҷикистон бобати масоили мушаххасоти техники нерӯгоҳ ба мувофиқае омада натавонистанд ва Тоҷикистон расман изҳор дошт, ки минбаъд аз ҳамкорӣ бо ширкати Русия даст мекашад. Моҳи августи соли 2007 ҳукумати ҶТ ба таври якҷониба қарордодро бо ширкати «Русский алюминий» бекор кард ва барои идомаи бунёди нерӯгоҳ Консорсиюми байнулмилалӣ таъсис дод. Моҳи марти соли 2008 Виктор Ющенко, президенти Украина, изҳор дошт, ки Украина низ манфиатдор аст, дар идомаи сохтмони нерӯгоҳ саҳм гузорад.
Точикистон расман Русияро ба бунёди НОБ-и «Роғун даъват» мекунад
«Точиксодиротбонк»: Аз руи қарзҳои додашуда соҳаи соҳибкори дар чои аввал аст
Кӯлоб: 9-уми июн. ОИ «Азия-Плюс» – Дар 5 моҳи соли ҷорӣ шӯъбаи «Тоҷиксодиротбонк» дар шаҳри Кӯлоб ба ҳамаи самтҳои фаъолияти қарздиҳӣ 7 млн. 277 ҳазору 758 сомонӣ маблағ ҷудо кардааст. Чӣ тавре ки ба ОИ «Азия-Плюс» Абдукарим Неъматов, сардори шӯъбаи бонк, иттилоъ медиҳад, нишондиҳандаи мазкур нисбат ба ҳамин давраи соли гузашта қариб ду баробар зиёд аст. Ба қавли ӯ, афзоиши нишондиҳандиҳандаи ҳаҷми қарздиҳӣ ба механизми нави сармоягузорӣ дар соҳаи пахтакорӣ марбут аст. «Ба 22 хоҷагии деҳқонии ноҳияҳои Восеъ, Кӯлоб ва Ҳамадонӣ, ки дар 1 ҳазору
501 га
кишти пахта мегузаронанд, аз 3 млн. 916,5 ҳазор сомонии қарзи талабшуда аллакай 2 млн. 445 ҳазору 696 сомониаш ба хоҷагиҳо дода шудааст», – идома дод манбаъ ва афзуд, ки сарчашмаи воситаҳои мазкур асосан пасандозҳои аҳолӣ мебошанд». А.Неъматов ҳамчунин зикр кард, ки аз ҷиҳати ҳаҷми қарздиҳӣ соҳаи кишоварзӣ дар мақоми дуввум (36,5%) аст. «Мақоми аввалро қарздиҳӣ ба соҳаҳои соҳибкории хурду миёна ишғол мекунад, ки ба он аз оғози сол 3 млн. 688 ҳазору 290 сомонӣ (50,7%-и ҳамаи қарзҳои хурд) маблағ ҷудо гардидааст, – гуфт А.Неъматов. – Ба сохтмончиён, роҳсозон, коргарони соҳаи саноат ва муҳоҷирони меҳнатӣ 13%-и қарзҳо ихтисос дода шудааст».
Дар Душанбе барномаи CIDA оид ба дастгирии гузариш ба иқтисоди бозори муаарифи гардид
Душанбе. 9-уми июн. ОИ «Азия-Плюс» – Дар дафтари Бунёди Аврупо ва Осиё дар Осиёи Марказӣ дар шаҳри Душанбе барномаи бурсии сафорати Канада дар Қазоқистон, Қирғизистон ва Тоҷикистон (CIDA), ки ба дастгирии давраи гузариш ба бозори иқтисодӣ равона гардидааст, муаррифӣ гардид. Набишер Ҷӯраев, корманди барномасози дафтари мазкур, зикр кард, ки чорабинӣ ба рушди ҷомеаи шаҳрвандӣ дар Тоҷикистон мусоидат хоҳад кард. Ба қавли ӯ, дар барномаи CIDA дастгирии самтҳои коҳиш додани сатҳи камбизоатӣ, рушди босубот, таъмини баробарҳуқуқии занону мардон, ҳифзи муҳити зист, дифоъ аз ҳуқуқи кӯдакон ва рушди иқтидори ташкилот пешбинӣ шудаанд.
«Дар чаҳорчӯбаи мулоқот бо ҳайати шахсии дафтари бунёд баррасии масъалаи имкони вусъат бахшидани фаъолияти Маркази дастгирии Ташкилотҳои ғайридавлатӣ (ТҒД) перомуни ҳалли мушкилоти ҳамарӯзаи онҳо дар назар аст, – гуфт Н.Ҷӯраев. – Бар замми ин, масоили пуштибонӣ аз манфиатҳои ТҒД дар соҳаҳои иҷтимоӣ ва иқтисодӣ ва ҳамчунин муҳайё сохтани шароити мусоид баҳри ҳамкории судманди ҷонибҳои манфиатдор низ мавриди муҳокима қарор мегиранд». Ёдовар мешавем, ки намояндагии Бунёди Аврупо ва Осиё дар Осиёи Марказӣ дар Тоҷикистон 15-уми ноябри соли 2006 ифтитоҳ гардидааст. Бунёди мазкур вориси Бунёди Аврупо ва Осиё буда, фаъолияти худро дар Тоҷикистон соли 1997 оғоз кардааст. Бунёди мазкур ҷонибдори дастгирии ташаббусҳои шаҳрвандони маҳаллӣ, ҳамкорӣ бо ҳукумат, созмонҳои ғайритиҷоратӣ ва сохторҳои соҳибкорӣ аст, то ки бештар талаботи ҷомеаро омӯхта, барномаҳои зарурӣ ва муҳимро, ки ба рушди босуботи ҷомеа ва баланд бардоштани сатҳи некӯаҳволии мардум нигаронида шудаанд, амалӣ созад. Намояндагиҳои Бунёд ҳамчунин дар шаҳрҳои Алма-Ато, Бишкек ва Ош ба қайд гирифта шудаанд.
Дар шаҳри Оши Қирғизистон намояндагии Агентии назорати маводи нашъаовари ЧТ ташкил мегардад
Душанбе. 9-уми июн. ОИ «Азия-Плюс» – Президенти ҶТ Эмомалӣ Раҳмон фармонро «Дар бораи ташкил додани намояндагии Агентии назорати маводи нашъаовари назди президенти ҶТ дар Ҷумҳурии Қирғизистон» ба имзо расонид. Аз дафтари матбуотии агентӣ ба ОИ «Азия-Плюс» иттилоъ доданд, ки мувофиқи фармон, намояндагии агентӣ дар Ҷумҳурии Қазоқистон барҳам дода шуда, дар заминаи он намояндагии агентӣ дар шаҳри Оши Қирғизистон ташкил мегардад. «Такрорӣ будани фаъолияти намояндаи мухтори (афсари соҳаи алоқа) Тоҷикистон дар Маркази ҳамоҳангсозии минтақавии иттилоотии Осиёи Марказӣ оид ба мубориза бар зидди гардиши ғайриқонунии маводи мухаддир, маводи психотропӣ ва прекурсорҳо дар шаҳри Алма-Ато ба барҳам додани намояндагии агентӣ дар Қазоқистон асос шудааст», – таъкид кард манбаъ. Бино ба иттилои сарчашма, намояндагии Агентии назорати маводи нашъаовари назди президенти ҶТ дар Қазоқистон моҳи октябри соли 2004 ба фаъолият шурӯъ кардааст, ки он ба баргузории як қатор амалиёти муваффақона бобати барҳам додани хатҳои интиқоли маводи мухаддир аз Афғонистон тавассути Тоҷикистон ба Қазоқистон, Русия ва минбаъд ба кишварҳои Аврупо мусоидат кардааст. Ёдовар мешавем, ки афсарони соҳаи алоқаи Агентии назорати маводи нашъаовари назди президенти ҶТ ҳамчунин дар 4 музофоти сарҳадии Афғонистон (Бадахшон, Қундуз, Балх ва Таҳор) низ фаъолият мекунанд.
Раис маводи сузишвории хочагии деҳқониро азхуд кардааст
Душанбе. 9-уми июн. ОИ «Азия-Плюс» – Кормандони Агентии назорати давлатии молиявӣ ва мубориза бо коррупсияи назди президенти ҶТ Бобоқул Абдуллоев, раиси хоҷагии деҳқонии «Истиқлолият»-и ноҳияи Ҷиликӯли вилояти Хатлонро тибқи моддаи 245-и Кодекси ҷиноии ҶТ (Азонихудкунӣ ё исрофкорӣ) гунаҳкор кардаанд. Бино ба иттилои дафтари матбуоти агентӣ, бо истифода аз мансаби хидматӣ раиси хоҷагӣ 16 ҳазору
110 литр
маводи сӯзишвории (солярка) хоҷагиро ба маблағи 56,5 ҳазор сомонӣ азхуд кардааст. «Комиссияи махсус фаъолияти раисро тафтиш карда истодааст ва аз эҳтимол дур нест, ки қонуншиканиҳои дигари Б.Абдуллоев низ ошкор гарданд», – зикр кард манбаъ.
Сармуҳосиби ноҳияи Чаббор Расулов дар чинояти сохтакории хизмати гумонбар дониста шудааст
Душанбе. 9-уми июн. ОИ «Азия-Плюс» – Кормандони Агентии назорати давлатии молиявӣ ва мубориза бо коррупсияи назди Президенти ҶТ, Ҳомид Қосимов, сармуҳосиби мақомоти иҷроияи ҳокимияти давлатии ноҳияи Ҷаббор Расуловро дар ҷинояти тасарруфи маблағҳои давлатӣ ва сохтакории хизматӣ гумонбар медонанд. Аз агентии номбурда ба ОИ «Азия-Плюс» хабар доданд, ки Ҳ.Қосимов тавассути тартиб додани ҳуҷҷатҳои қалбакӣ 130 ҳазору 548 сомонӣ маблағҳои давлатиро тасарруф кардааст. «Нисбат ба сармуҳосиби номбурда тибқи моддаҳои 245 (Азонихудкунӣ ё исрофкорӣ) ва 323 (Сохтакории хизматӣ)-и КҶ ҶТ парвандаи ҷиноӣ оғоз гардидааст», – зикр кард манбаъ ва афзуд, ки мансабдори гумонбаршуда аллакай ба ҳабс гирифта шудааст.
Чангалбони боғи «Ғалаба»-и пойтахт барои фуруши замин варақаҳо ва муҳри замони шуравиро истифода бурдааст
Душанбе. 9-уми июн. ОИ «Азия-Плюс» – Кормандони Агентии назорати молиявии давлатӣ ва мубориза бо коррупсияи назди Президенти ҶТ ҷангалбони боғи «Ғалаба»-и пойтахт Маҳкам Ҷӯраевро дар содир кардани ҷиноят тибқи моддаи 247-и Кодексии ҷиноии ҶТ (қаллобӣ ба миқдори калон) гунаҳкор кардаанд. Чӣ тавре ки ба ОИ «Азия-Плюс» аз дафтари матбуоти агентӣ хабар доданд, гумонбаршуда бар ивази мукофотпулӣ ба маблағи $6 ҳазор ба сокини пойтахт ваъда додаст, ки барои бунёди манзили зист ба ӯ қитъаи замин ҷудо мекунад ва ӯро бовар кунонидааст, ки ҳуҷҷатҳои замин ба таърихи гузашта қайд карда хоҳанд шуд. «Кормандони агентӣ ҷангалбонро ҳангоми гирифтани пора дар хонааш дастгир карданд. Зимни кофтуков аз хонаи М.Ҷӯраев ҳамчунин миқдори зиёди варақаҳои холии қарорҳои Шӯрои вакилони мардумии ноҳияи Октябри шаҳри Душанбе, Ҷумҳурии Шӯравии Сотсиалистии Тоҷикистон бо мӯҳру имзоҳо дарёфт гардида, мусодира шуд», – изҳор дошт манбаъ. Бино ба иттилои сарчашма, аз гумонбаршуда ҳамчунин 16 шиносномам шаҳрванди ҶТ ва каме маводи мухаддир низ мусодира гардидааст.
Дар Точикистон тайи панч моҳ ҳудуди се тонна маводи мухаддир мусодира шудааст
Душанбе. 9-уми июн. ОИ «Азия-Плюс» – Дар муддати панҷ моҳи соли ҷорӣ мақомоти ҳифзи ҳуқуқи ҶТ аз гардиши ғайриқонунӣ 2 тоннаву 883 килою 775 грамм маводи мухадирро мусодира кардаанд, ки нисбат ба нишондиҳандаи ҳамин давраи соли гузашта 37,7% бештар аст. Ба ОИ «Азия-Плюс» аз Агентии назорати маводи нашъаовари назди президенти ҶТ иттилоъ доданд, ки 856 килою 624 грамм ҳероин мусодира шудааст, ки аз нишондиҳандаи соли гузашта 16,7% бештар аст. Афюн ба миқдори 1 тоннаву 255 килою 819 грамм ва маводи мухаддири гурӯҳи хашхош 771 килою 331 грамм мусодира гардидааст, ки мутаносибан нисбат ба ҳамин давраи соли гузашта 30,5% ва 94% бештар аст. «Дар давраи мазкур кормандони агентӣ 42 ҳодисаи гардиши ғайриқонунии маводи мухаддирро пешгирӣ карда, 813 килою 926 грамм маводи мухаддирро мусодира кардаанд, ки нисбат ба нишондиҳандаҳои панҷ моҳи соли 2007 5,3 маротиба бештар аст», – изҳор дошт манбаъ. Ба қавли намояндаи агентии мазкур, бо назардошти муҳимии масъалаи мубориза бар зидди гардиши ғайриқонунии трансмиллии маводи мухаддир, агентӣ ҷиҳати ба роҳ мондани ҳамкории мутақобила бо мақомоти ҳифзи ҳуқуқи ҷумҳурӣ, кишварҳои узви ИДМ ва Афғонистон кӯшиш ба харҷ медиҳад. Дар ин давра дар ҳамкорӣ бо Кумитаи давлатии амнияти миллӣ ва Хадамоти гумруки ҷумҳурӣ 4 амалиёти муштараки муваффақона гузаронида шуда, 38 килою 959 грамм маводи мухаддир мусодира шудааст. «Агентӣ ӯҳдадориҳои вогузоштаро мувофиқи созишномаҳои байниҳукуматӣ ва байниидоравӣ дар соҳаи мубориза бар зидди гардиши ғайриқонунии маводи мухаддир ба иҷро мерасонад. Дар панҷ моҳи соли ҷорӣ 15 амалиёти муштараки байнулмилалӣ бо мақомоти ҳифзи ҳуқуқи Афғонистон ва Қазоқистон гузаронида шудааст, – таъкид сохтанд дар агентӣ. – Аз гардиши ғайриқонунӣ 928 килою 589 грамм маводи мухаддир, аз ҷумла 312 килою 159 грамм маводи ҳероин мусодира гардидааст».
Баррасии парвандаи «Эсхатабонк» муқобили «Кабоол Точик Текстайлз» шуруъ гардид
Хуҷанд. 9-уми июн. ОИ «Азия-Плюс» – Дар додгоҳи иқтисодии вилояти Суғд баррасии парвандаи даъвоии Ҷамъияти саҳҳомии шакли кушоди (ҶСК) «Эсхата бонк» муқобили Ҷамъияти саҳҳомии шакли пӯшидаи (ҶСП) КМ «Кабоол Тоҷик текстайл» шурӯъ гардидааст. Дар ин бора ба ОИ «Азия-Плюс» аз додгоҳи иқтисодии вилоят хабар дода, зикр карданд, ки даъвогар дар таърихи 16-уми май бо талаби азҷавобгар рӯёнидани беш аз $474 ҳазор муроҷиат кардааст ва ин ҷо гап сари моликияти ба гаравмонда ва баргардонидани қарзи бонк меравад. Дар ҳамин ҳол, корхонаи (ҶСК КМ «Кабоол Тоҷик текстайлз»), ки дар он ҳудуди 1 ҳазор нафар (асосан занон) кор мекунанд, аз моҳи марти соли ҷорӣ аз фаъолият бозмондааст ва ба гуфтаи раиси иттифоқи касабаи корхона Мунаввара Аҳмедова корхона аз 19 марти соли равон кор намекунад. «Намояндагони ҳамкори хориҷӣ – корхонаи «Кабоол ЛТД»-и Куриёи Ҷанубӣ, ки 56%-и саҳмияҳоро соҳибанд, он замон эълон доштанд, ки корхона танҳо дар рӯзҳои ҷашни Иди Наврӯз фаъолият нахоҳад кард, вале ҳамон рӯз онҳо корхонаро тарк карда, дигар барнагаштаанд», – гуфт М.Аҳмедова. «Коргарон то ҳанӯз умедворанд, ки муассиса аз нав ба фаъолият шурӯъ хоҳад кард, – гуфт ӯ. – То имрӯз аз кор 12 нафар озод шудаанд ва дигарон аз моҳи март маош намегиранд». Бино ба иттилои роҳбарони корхона, масъалаи мазкур то ҳанӯз норавшан аст. Онҳо мегӯянд, ки ҳамкорони хориҷиашон ба мактубҳо ҳам посух намедиҳанд ва айни замон бино, иншоотҳо ва таҷҳизоти истеҳсолиро кормандони шӯъбаи корҳои дохилии шаҳр посбонӣ мекунанд.
Гумонбаршудагони қатли хабарнигори рус рузҳои наздик ба курсии айбдори менишинанд
Душанбе. 9-уми июн. ОИ «Азия-Плюс» – Эҳтимол меравад, ки парвандаи ҷиноии қатли хабарнигори рус Илёс Шурпаев аллакай ахири моҳи июн ба додгоҳ пешниҳод гардад. Чӣ тавре ки ба ОИ «Азия-Плюс» аз Прокуратураи генералии ҶТ иттилоъ доданд, ҳамаи маводи парвандаи ҷиноӣ аз Русия дастрас шудааст. «Мо дар рӯзҳои наздик омӯзиши пурраи маводҳоро ба анҷом мерасонем. Бо итмоми амалиёти тафтишоти пешакӣ ба гумонбаршудагон Масрур Ятимов ва Наҷмиддин Муҳиддинов айбномаи ниҳоӣ пешниҳод гардида, парванда ба додгоҳ ирсол карда мешавад», – зикр кард манбаъ ва афзуд, ки эҳтимол парвандаи ҷиноӣ ҷиҳати баррасӣ ба додгоҳ ахири ҳамин моҳ пешниҳод шавад. Ёдовар мешавем, ки Илёс Шурпаев шаби 21-уми март дар хонаи ба иҷора гирифтааш, дар қисмати шимолу шарқии шаҳри Маскав кушта шуда буд. Муфаттишони Русия дар содир кардани ин ҷиноят шаҳрвандони Тоҷикистон Масрур Ятимови 25-сола ва Наҷмиддин Муҳиддинови 20-соларо, ки пас аз як рӯзи содир кардани ҷиноят ба ватан баргашта буданд, гумонбар донистанд. Кормандони мақомоти ҳифзи ҳуқуқи Русия 29 март ба шаҳри Душанбе омада, аз ҳодисаи мазкур ҳамтоҳои тоҷикистонии худро огоҳ сохтанд ва худи ҳамон рӯз гумонбаршудагон дастгир карда шуданд. Ҳамроҳи онҳо бародари Н.Муҳиддинов низ боздошт гардид, вале маълум гардид, ки ӯ ҷиноят содир накардааст ва шоҳиди ҷиноят ҳам набудааст, танҳо милитсияро аз содир намудани ҷиноят огоҳ насохтааст. Тибқи қонунгузории ҶТ, шоҳидӣ накардан ба хешованди наздик ҷиноят ҳисобида намешавад. Зимни кофтуков аз М.Ятимов ва Н.Муҳиддинов далелҳои шайъӣ – соати тиллоӣ, ноутбук, телефонии мобилии хабарнигори кушташуда ва 150 ҳазор рубли русӣ дарёфт гардид. Гумонбаршудагон даст доштани худро дар содир намудани ҷиноят комилан эътироф карданд. Дар таърихи 8-уми апрел Прокуратураи генералии ҶТ ба гумонбаршудагон расман тибқи ду моддаи КҶ ҶТ айбнома эълон кард. М.Ятимов ва Н.Муҳиддинов тибқи моддаҳои 104 (одамкушӣ) ва 249 (роҳзанӣ)-и КҶ ҶТ гумонбар дониста шудаанд.