Душанбе. 20-уми март. ОИ «Азия-Плюс» – Нахустнамоиши спектакли «Девонагӣ. Соли 93»-и коргардони театри академии русии ба номи Маяковский Барзу Абдураззоқов, ки рӯзи 17-уми март мсуаррифӣ гардида буд, дар Душанбе манъ карда шуд.
Дар мусоҳиба бо хабарнигори ОИ «Азия-Плюс» Барзу Абдураззоқов изҳор дошт, ки дар муаррифномаи спектакл дар қатори намояндагони вазорати фарҳанг ва доираҳои фарҳангии кишвар намояндагони дипломатии кишварҳои дигар ва созмонҳои байнулмилалӣ ширкат варзида, ба намоишнома баҳои баланд доданд, вале намояндагони вазорати фарҳанг намоиши спектаклро ғайрирасмӣ манъ эълон карданд. «Намояндагони вазорат мегӯянд, бинобар хусусияти инқилобӣ доштани спектакл намоиши он манъ гардидааст», – гуфт ӯ ва афзуд, ки қаблан мазмуну мӯҳтавои спектакл ба вазорати фарҳанг пешниҳод гардида, мувофиқа ҳосил шуда буд.
Дар ҳамин ҳол, дар Вазорати фарҳанги ҶТ аз шарҳи иттилои марбут ба ин қазия худдорӣ намуданд.
