Дастаи мунтахаби футболи Тоҷикистон дар бозии даври 4-уми марҳилаи интихобии Ҷоми Осиё-2027 муқобили Малдив пирӯзӣ ба даст овард.
Ин рақобат дар гурӯҳи “А” дар Варзишгоҳи миллии шаҳри Малеи кишвари Малдив баргузор шуда, бо ҳисоби 3:0 ба фоидаи дастаи мо анҷом ёфт. Голҳои тими миллии Тоҷикистонро Шервонӣ Мабатшоев (ду гол) ва Манучеҳр Сафаров ба самар расонид.
Дар бозии дигари гурӯҳи “А” тими Филиппин муқобили Тимори Шарқӣ бозӣ карда, бо ҳисоби 3:1 пирӯз шуд.
Акнун пас аз чор давр Тоҷикистон ва Филиппин бо касби 10 имтиёз дар садри аввали ҷадвал қарор доранд. Тимори Шарқӣ (3 имтиёз) ва Малдив (ҳоло имтиёз надорад) дар зинаҳои сеюм ва чорум қарор гирифтаанд.
Дар бозиҳои даври 5-уми марҳилаи интихобии Ҷоми Осиё-2027, Тоҷикистон бо Тимори Шарқӣ ва Филиппин бо Малдив дидор анҷом медиҳанд. Набарди дастаи мо муқобили Тимори Шарқӣ рӯзи 18-уми ноябр дар дар шаҳри Дарвини Австралия баргузор мешавад.
Бозии давраи 6-ум рӯзи 31-уми марти соли 2026 баргузор мешавад. Дар доираи он Тоҷикистон бо Филипин ва Тимори Шарқӣ бо Малдив дидор анҷом медиҳанд.
Бояд гуфт, танҳо ғолибони гурӯҳҳои марҳилаи интихобии Ҷоми Осиё-2027 ба марҳилаи асоси мусобиқа роҳхат мегиранд. Ҳар даста дар марҳилаи интихобӣ 6 бозӣ баргузор мекунад.
