Вазорати корҳои хориҷии ҶТ хабар медиҳад, ки бо мақсади татбиқи чораҳои фаврӣ ҷиҳати пешгирии сироят ва шуюи коронавируси COVID-19, дар мавриди вуруд ва хуруҷи шаҳрвандони хориҷӣ ва шахсони бешаҳрвандӣ тавассути гузаргоҳҳои сарҳади давлатии Тоҷикистон маҳдудиятҳои муваққатӣ ҷорӣ шудаанд.
“Ин маҳдудиятҳо нисбат ба кормандони намояндагиҳои дипломатӣ ва консулии давлатҳои хориҷӣ ва намояндагиҳои созмонҳои байналмилалӣ ва ниҳодҳои молиявӣ, инчунин аъзои оилаи онҳо, ки дар Тоҷикистон аккредитатсия шудаанд, татбиқ намешаванд. Дар сурати ворид шудани гурӯҳи мазкури шахсон ба Тоҷикистон, онҳо дар маҳалли зисти доимӣ таҳти назорати кормандони Вазорати тандурустӣ ва ҳифзи иҷтимоии ҶТ ба муддати 14 рӯз карантин мешаванд”, – таъкид кардааст ВКХ ҶТ.
Маҳдудиятҳои мазкур инчунин нисбат ба ронандагоне, ки ба ҳамлу нақли байналмилалӣ машғуланд (тибқи тартиби муваққатӣ) ва сарнишинони ҳавопаймову қатораҳо татбиқ намешаванд.
“Дар ҳолати зарурати баромадани шаҳрвандони хориҷӣ аз Тоҷикистон, ки ба гурӯҳҳои мазкур дохил нестанд, Ситоди ҷумҳуриявӣ оид ба пурзӯр намудани чораҳои зиддиэпидемикӣ омода аст, муроҷиатҳои расмии кишварҳои хориҷӣ, аз ҷумла, ташкили парвозҳои махсусро баррасӣ кунад”, – тавзеҳ додааст ВКХ.
Тамдиди муҳлати эътибори раводид ва бақайдгирӣ
Вазорати корҳои хориҷии ҶТ ҳамчунин хабар медиҳад, ки муҳлати эътибори раводид ва бақайдгирии шаҳрвандони хориҷӣ ва шахсони бешаҳрвандӣ, ки муваққатан дар ҳудуди Тоҷикистон қарор доранд, то ба эътидол омадани вазъи эпидемиологӣ тамдид мешавад.
Шаҳрвандони хориҷӣ ва шахсони бешаҳрвандӣ барои тамдиди раводид метавонанд ба Сарраёсати консулии Вазорати корҳои хориҷӣ, намояндагии ВКХ дар вилояти Суғд ва ҷиҳати тамдиди муҳлати бақайдгирӣ ба воҳидҳои сохтории Хадамоти шиносномавию бақайдгирии ВКХ ҶТ муроҷиат намоянд.
“Бояд таъкид кард, ки тамоми дархостҳои шаҳрвандони хориҷӣ ва шахсони бешаҳрвандӣ мувофиқи тартиби муқарраршудаи қонунгузории кишвар мавриди баррасӣ ва иҷрои фаврӣ қарор дода мешаванд”, – омадааст дар хабари ВКХ.
Мушаххасоти тамос:
Сарраёсати консулӣ
шаҳри Душанбе
кӯчаи Пушкин, 34
тел: 227-63-63
e-mail: [email protected]
Намояндагии Вазорати корҳои хориҷӣ дар вилояти Суғд
шаҳри Хуҷанд
кӯчаи М. Танбӯрӣ, 5
тел: +992 000104244
e-mail: [email protected]
Хадамоти шиносномавию бақайдгирии Вазорати корҳои дохилӣ
Қабулгоҳ: 227 55 54
Муовини сардор: 227 17 35
Муовини сардор: 227 86 31
ХШБ дар вилояти Суғд: 927775502
ХШБ дар вилояти Хатлон: 904170808
ХШБ дар ВМКБ: 935028336
ХШБ дар Рашт: 981007112
