Вазири молияи Тоҷикистон Абдусалом Қурбониён ҳафтаи равон ба рӯзноманигрон
иттилоъ дод
, ки президенти Мамлакат Эмомалӣ Раҳмон дастур додааст, ки хароҷоти буҷет кам карда шавад.
Ба гуфтаи ӯ, бар асоси ин дастур Вазорати молия тасмим гирифтааст, ки «хароҷоти дуюмдараҷа», аз ҷумла харидории мебел, автомашинаҳои хизматӣ аз ҷониби ташкилоту корхонаҳои давлатӣ ва сохтмони иншооти начандон муҳим ва ғайраро боздорад.
Ҳамин тариқ, ҳаҷми қисмати хароҷоти буҷет 450 млн. сомонӣ (беш аз 57,2 млн. $ бо қурби ҷории Бонки миллӣ) кам карда мешавад. «Буҳрони иқтисодии идомадошта дар кишварҳои шарики Тоҷикистон ба коҳиши нишондиҳандахои асосии макроиқтисодӣ дар кишвари мо, аз ҷумла ҳаҷми даромад ба буҷет боис мегардад», – эътироф кард ӯ.
Зимнан зикр гардид, ки тӯли 6 моҳи соли ҷорӣ нақшаи буҷет аз рӯи андозҳо ба маблағи 421,4 млн. сомонӣ иҷро нагардида, аз ҳисоби пардохтҳои гумрукӣ 266,6 млн. сомонӣ камтар ба буҷет маблағ ворид шудааст ва дар маҷмӯъ камбуди буҷети давлатӣ дар нимсолаи аввал беш аз 687 млн. сомониро ташкил додааст.
Қобили зикр аст, ки дар соли 2016 ҳаҷми умумии Буҷети давлатии Тоҷикистон 18 млрд. 306 млн. сомонӣ пешбинӣ шудааст, ки нисбат ба буҷети соли 2015 дар ҳаҷми 3,3 млрд. сомонӣ ё худ 19,8% зиёдтар аст.
