Идораи миллии имтиҳонҳои таҳти раҳбарии Толибон* мегӯяд, ки дар имтиҳони дохилшавӣ имсол танҳо донишҷӯёни мард ширкат хоҳанд кард. Дар ин бора рӯзномаи "8-и субҳ" хабар медиҳад.
Ба иттилои манбаъ, дирӯз, 18-уми июл, ин ниҳод дар Твиттер навиштааст, ки мамнӯъияти ширкати донишҷӯдухтарон бо фармони хаттии Вазорати таҳсилоти олии Толибон сурат гирифтааст.
Бояд гуфт, ки Толибон бо тасаллути дубора ба Афғонистон, монанди давраи аввали ҳокимияти худ, дари мактабҳои миёна ва литсейҳоро ба рӯи духтарон бастаанд.
Бо вуҷуди тааҳҳудоти чандинкаратаи масъулони ин гурӯҳ барои боз кардани мактабҳо, духтарони Афғонистон тақрибан ду сол боз аз таҳсил маҳруманд.
Ҳарчанд интизор мерафт, ки ин тасмими Толибон кӯтоҳмуддат хоҳад буд. Зеро тақрибан ду сол пеш сарпарасти Вазорати маорифи Толибон дар бораи "муҳайё кардани фазои амн барои таҳсили духтарон тибқи шариати исломӣ" ҳарф зада буд, аммо дар поёни соли 2022 фармони мутаваққиф шудани таҳсили духтарон ноумедии духтарони Афғонистонро бештар кард.
Ба рӯи духтарон баста шудани мактабу донишгоҳҳо ҳамеша вокунишҳои миллӣ ва байнулмилалӣ доштааст, вале то ҳол ҳеҷ як аз ин вокунишҳо натиҷаи мусбат надодааст.
*Дар Тоҷикистон гурӯҳи террористӣ эътироф шудааст.
Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.
