Оғози ҳафтаи равон рейди махсус оид ба ошкор кардани шаҳрвандони хориҷии ғайриқонунӣ машғул ба кор дар пойтахт оғоз гардид.
Ин чорабинӣ бо супориши раиси шаҳри Душанбе Маҳмадсаид Убайдуллоев бо мақсади ҳифзи бозори меҳнати пойтахт ва ҳамчунин ошкор сохтани далелҳои фаъолияти меҳнатии ғайриқонунии шаҳрвандони хориҷӣ аз ҷониби Раёсати Хадамоти муҳоҷирати назди ҳукумати ҶТ дар шаҳри Душанбе ва навоҳии тобеи марказ дар ҳамдастӣ бо кормандони мақомоти прокуратура доир мегардад.
Бино ба маълумоти маркази матбуоти Хадамоти муҳоҷирати назди ҳукумати ҶТ, аз оғози рейд дар қаламрави шаҳри Душанбе 9 далели фаъолияти меҳнатии ғайриқонунии шаҳрвандони кишварҳои хориҷӣ ошкор карда шудааст. Нисбати чор нафар шаҳрвандони Чин, се нафар шаҳрвандони Афғонистон ва ду тан аз шаҳрвандони Покистон, ки ба фаъолияти меҳнатии ғайриқонунӣ дар пойтахт машғул буданд, санадҳои маъмурӣ тартиб дода шудааст.
Зимнан зикр мегардад, ки рейд идома дошта, дар бораи натоиҷи он иловатан хабар дода мешавад.
Дар ҳамин ҳол, бино ба маълумоти Хадамоти федералии муҳоҷирати Русия, айни замон дар Русия 400 ҳазор нафар шаҳрвандон ғайриқонунӣ ҳузур доранд.
