Бо мақсади шиносоӣ бо ҷараёни сохтмони иншооти гуногуни таъиноти иҷтисодиву иҷтимоӣ ва фаъолияти иншооти энерегетикӣ, нахуствазири Тоҷикистон Оқил Оқилов аз шаҳри Норак боздид намуд.
Сармушовири хадамоти мабуоти президенти кишвар Субҳиддин Муҳиддинов ба ОИ «Азия-Плюс» хабар дод, ки нахуствазир бо фаъолияти нерӯгоҳи «Норак», филиали ҶСК «Тоҷикгидромонтаж» ва шабакаи интиқоли барқи 500 кВт дар шаҳри Норак аз наздик ошно гардид.
Бо натиҷагирӣ аз фаъолияти иншооти мазкур нахуствазир ба раҳбарияти корхонаҳо ва мақомоти дахлдор ҷиҳати таъмини фаъолияти мунтазами ин иншоот дастуру супоришҳои мушаххас дод.
Дар идомаи сафар Оқил Оқилов бо ҷараёни корҳои сохтмонӣ дар маркази солимӣ, маркази муосири тиҷоратӣ, маҷмааи варзишӣ ва дигар иншооти таъиноти иҷтимоӣ дар шахри Норак низ шинос шуд.
