Дар Суди олии ҶТ мурофиаи судӣ нисбати иштирокчиёни эҳтимолии рӯйдодҳои Хоруғ дар тобистони соли гузашта Димон Ашӯров ва Шерик Карамхудоев оғоз гардид. Ба гуфтаи адвокатҳо, он аллакай бо риоя нашудани меъёрҳои мурофиавӣ шурӯъ шудааст.
Ба гуфтаи Шуҳрат Қудратов, адвокати Димон Ашӯров, ҳангоме ки парванда ба суд дода шуд, адвокат ба судя ордер дпешниҳод намуда, иҷозати дидор бо зерҳимояашро дархост кардааст, вале судя Нуриддин Расулов онро рад намудааст.
Шуҳрат Қудратов мегӯяд, ӯ ҷиҳати рад шудани судя ва баргузор намудани мурофиаи сайёри судӣ оид ба ин парванда дар шаҳри Хоруғ низ ба судя дархост пешниҳод намудааст, вале ин пешниҳодҳои ӯ низ ба инобат гирифта нашудаанд. «Мурофиаи судӣ аз бозпурсии Ш.Карамхудоев оғоз гардида, ӯ айби худро танҳо бо як моддаи 195-и КҶ ҶТ (Ғайриқонунӣ нигоҳ доштани аслиҳа) эътироф намуд», – афзуд адвокат.
Бино ба маълумоти Прокуратураи генералии ҷумҳурӣ, мақомоти тафтишот бар ин назар аст, ки ҳарду айбдоршавандан дар муқовимати мусаллаҳона алайҳи нерӯҳои ҳукуматӣ ҳангоми рӯйдодҳои Хоруғ даст доранд. Парвандаи ҷиноии мазкур аз 8 фасл иборат аст.
Ҳамчунин мебояд зикр намуд, ки моҳи декабри соли гузашта Прокуратураи генералӣ изҳор карда буд, ки шахсонеро, ки аз 25-уми июл то 20-уми декабри соли гузашта баъд аз рӯйдодҳои Хоруғ ихтиёран аслиҳаашонро ба мақомот таслим кардаанд, аз ҷавобгарии ҷиноятӣ озод намудааст.
Он замон хадамоти матбуоти Прокуратураи генералии ҶТ иттилоъ дода буд, ки қарори афви чунин шахсон бо тавсияи гурӯҳи тафтишотӣ ва розигии муовини аввали прокурори генералии ҶТ қабул шудааст.
